शिक्षकांच्या वैयक्तिक मान्यतेची माहिती भरण्यासाठी मुदतवाढ

शिक्षकांच्या वैयक्तिक मान्यतेची माहिती भरण्यासाठी मुदतवाढ

मुंबई, ता. २८ : राज्यातील प्राथमिक, माध्यमिक, उच्च माध्यमिक आणि कनिष्ठ महाविद्यालयातील शिक्षकांना त्यांच्या वैयक्तिक मान्यतेचे अहवाल तसेच शालार्थ मान्यता आदींची कागदपत्रे शालार्थ प्रणालीमध्ये अपलोड करण्यासाठी १५ सप्टेंबरपर्यंत मुदतवाढ देण्यात आली आहे. या मुदतीत शिक्षकांना जर आपली कागदपत्रे जमा करता आली नाही तर त्यांच्यावर थेट कारवाईचा बडगा उगारला जाणार आहे.

खासगी अनुदानित संस्थाचालकांकडून राज्यात प्रचंड मोठ्या प्रमाणात शिक्षकांच्या वैयक्तिक मान्यतेसाठी अनागोंदी करण्यात आल्याने असंख्य शिक्षकांच्या वैयक्तिक मान्यतेची कागदपत्रे शालार्थ प्रणालीवर अपलोड होऊ शकली नाहीत. शिवाय यात संस्थाचालकांच्या कुटुंबातील व्यक्ती, नातेवाइकांच्याही कागदपत्रांमध्ये आणि त्यांच्या मान्यतांमध्येही प्रचंड मोठ्या प्रमाणात गैरप्रकार असल्याने अनेक संस्थाचालकांकडून ही कागदपत्रे अपलोड करण्यासाठी दिरंगाई केली जात आहे. काहींनी तर शिक्षक आमदारांना हाताशी धरून ही कागदपत्रे अपलोड करण्यासाठी सहा महिन्यांची मुदत माग‍ितली असल्याने यात अनेक गैरप्रकरणे समोर येण्याची शक्यता आहे. यामुळेच विभागाकडून केवळ १५ सप्टेंबरपर्यंतच मुदतवाढ देण्यात आल्याने सांगण्यात आले. यामुदतीत जर योग्य आणि प्रमाण असलेली कागदपत्रे जमा झाली नाही तर येत्या काळात शिक्षक, संस्थाचालकांवरही कारवाई केली जाणार असल्याचेही सांगण्यात आले.