सोशल मिडीयाचा सदुपयोग आणि खडबडून जागे झाले प्रशासन

खड्ड्यांचा व्हिडिओ अन् कारवाई
सामाजिक माध्यमातून प्रशासनाला जाग; खड्डे दुरुस्तीला सुरुवात
कल्याण, ता. २८ (वार्ताहर) : समाजमाध्यमांचा अनेकदा दुरुपयोग होत असल्याच्या बातम्या येत असतात, परंतु याने सकारात्मक बदलही झाले आहेत. अशाच सापाड गावातील ग्रामस्थ दिनेश मढवी यांनी सापडगाव ते कल्याण शहर या प्रमुख रस्त्यांवर पडलेल्या खड्ड्यांचे व्हिडिओ काढून समाजमाध्यमावर टाकले होते. या व्हिडिओची दखल घेत गणपती आगमनाच्या दिवशी रस्त्यातील खड्डे बुजवण्याचे काम प्रशासनाने सुरू केले आहे.
सापाडकर ग्रामस्थ मागील ४० वर्षांपासून दरवर्षी न चुकता कल्याण-डोंबिवली पालिका प्रशासनास कर नियमाने भरतात, परंतु स्मार्ट सिटीचा भाग असूनसुद्धा एखाद्या मागासलेल्या खेड्यात राहतो, असे ग्रामस्थांना वाटत आहे. याच परिस्थितीला कंटाळून दिनेश मढवी यांनी समाजमाध्यमांवर व्हिडिओ टाकला.
कल्याण-डोंबिवली महानगरपालिकेतील प्रभाग क्र. एक सापाड-उंबर्डे-कोळीवली-गांधारे विभागात प्रशासनाच्या दुर्लक्षामुळे येथील जनता होरपळून निघाली आहे. सामान्य नागरिकांना होणारा त्रास अनावर होऊन ते व्यक्त होत आहेत. सत्यता व्यक्त केल्याने स्थानिक ग्रामस्थांवर दबाव आणण्यासाठी त्यांना फोनवरून व इतर माध्यमातून धमक्या व दमदाटी करण्याची दाट शक्यता असल्याची प्रतिक्रिया आम आदमी पार्टी कल्याण पश्चिम अध्यक्ष रुपेश पाटील यांनी व्यक्त केली आहे.