मुंबई पुणे राष्ट्रीय महामार्ग जाम

घाटमाथ्यावरून लाखो मराठा मुंबईकडे
खालापूर, ता. २८ (बातमीदार) : आरक्षणाच्या लढाईसाठी मराठा समाजाचे नेते मनोज जरांगे पाटील यांना पाठिंबा देण्यासाठी लाखोंच्या संख्येने मराठा बांधव घाटमाथ्यावरून मुंबईकडे निघाले असून, मुंबई-पुणे राष्ट्रीय महामार्गावर वाहतुकीचे नियोजन करताना पोलिसांची दमछाक झाल्याचे चित्र होते.
मनोज जरांगे मुंबईत आझाद मैदान येथे उपोषण करणार असून, मराठा समाज मोठ्या संख्येने मुंबईकडे निघाला आहे. पिकअप, टेम्पो, दुचाकी आणि सायकलवरून प्रवास करत मुंबई गाठत आहेत. मुंबई-पुणे राष्ट्रीय महामार्ग, मुंबई-पुणे द्रुतगती मार्गावरुन वाहन मुंबईच्या दिशेने जात असून, खालापूर फाटा, खोपोली, दांड फाटा येथे वाहतुकीचे नियोजन करण्यासाठी पोलिसांचा मोठा फौजफाटा उपस्थित होता. मुंबईकडे जाणाऱ्या मराठा बांधवांसाठी खालापूर तालुक्यात मुंबई-पुणे राष्ट्रीय महामार्गालगत जागोजागी पाणी, नाश्ता, चहाची सोय करण्यात आली होती.