अनैतिक संबधाच्या संशयावरुन पत्नीला जिवंत जाळले

अनैतिक संबंधाच्या संशयावरून पत्नीला जाळले
नवी मुंबई, ता. २८ (वार्ताहर) : अनैतिक संबंधांच्या संशयावरून पत्नीला जिवंत जाळल्याची धक्कादायक घटना उरणमधील पागोटे गावात घडली आहे. राजकुमार रामशिरोमणी साहू (वय ३५) या व्यक्तीने आपली पत्नी जगराणी साहू (वय ३२) हिचे हातपाय बांधून तिला रॉकेल टाकून पेटवून दिले. ही घटना त्यांच्या सात वर्षांच्या मुलीसमोर घडली. सुरुवातीला पतीने पत्नीने स्वतःला जाळून घेतल्याचा बनाव रचला होता; मात्र मुलीने पोलिसांना सत्य सांगितले आणि हा क्रूर प्रकार उघडकीस आला.
आरोपी राजकुमार साहूला पत्नीच्या चारित्र्यावर संशय होता, ज्यामुळे त्यांच्यात सतत भांडणे होत असत. २५ ऑगस्ट रोजी रात्री याच कारणावरून झालेल्या भांडणानंतर त्याने हे पाऊल उचलले. घटनेनंतर तो मुलीसह पळून गेला होता. उरण पोलिसांना घटनेची माहिती मिळताच त्यांनी तात्काळ घटनास्थळी धाव घेतली. परंतु, जगराणीचा १०० टक्के भाजल्याने जागीच मृत्यू झाला होता.
पोलिसांनी राजकुमार साहूला ताब्यात घेऊन चौकशी केली असता, त्याने गुन्ह्याची कबुली दिली. त्यानंतर पोलिसांनी त्याच्याविरोधात हत्येचा गुन्हा दाखल करून त्याला अटक केली आहे. न्यायालयाने आरोपीला १ सप्टेंबरपर्यंत पोलिस कोठडी सुनावली आहे.