भिंत कोसळून महिलेचा मृत्यू

भिंत कोसळून महिलेचा मृत्यू
साकीनाक्यात सहा घरांचे नुकसान

घाटकोपर, ता. २९ (बातमीदार) : साकीनाका येथे घराशेजारील भिंत कोसळून एक महिलेचा मृत्यू झाला. यात पाच ते सहा घरांचे मोठे नुकसान झाले आहे.
साकीनाका परेरावाडी येथे संत गुलाबबाबा सोसायटी आहे. या सोसायटीमधील दोन चाळींच्या मधल्या संरक्षक भिंतीसह घरांच्या खालील जमीन समोरील चाळीवर कोसळली. या वेळी इथे कपडे धुण्यास बसलेल्या चंद्रकला श्रीकांत गावकर (वय ५१) या त्या दरडीखाली चिरडल्या गेल्या. स्थानिकांनी याची माहिती अग्निशमन विभाग, पालिका आणि पोलिसांना दिली. घटनास्थळी अग्निशमन दाखल झाले आणि त्यांनी महिलेला बाहेर काढून उपचारासाठी पालिकेच्या राजावाडी रुग्णालयात उपचारासाठी दाखल केले. दरम्यान, डॉक्टरांनी उपचारापूर्वीच चंद्रकला यांना मृत घोषित केले. मुंबई महापालिकेच्या वतीने इथली सहा घरे रिकामी करण्यात आली असून, त्यांना सुरक्षित ठिकाणी स्थलांतरित करण्यात आले आहे. या घटनेमुळे या परिसरात खळबळ उडाली असून, भीतीचे वातावरण निर्माण झाले आहे.