आग्रोळीत ‘एक गाव एक गणपती’

तुर्भे, ता. ३० (बातमीदार) : नव्या मुंबईच्या वेशीवरील आग्रोळी गाव ‘एक गाव, एक गणपती’ परंपरेसाठी ओळखले जाते. ६४ वर्षांपूर्वी गावातील भाऊ पाटील यांनी लोकांमध्ये एकोपा टिकावा, यासाठी ही परंपरा सुरू केली होती.
सणासुदीच्या काळातील अनावश्यक खर्च कमी करणे, तसेच सामाजिक एकतेची भावना वाढवण्यासाठी आग्रोळी गावात १९६१ मध्ये ही आदर्शवत संकल्पना राबवण्यात आली. ही परंपरा ६४ वर्षांपासून अखंडपणे पाळली जात आहे. या काळात गावातील सर्व लोक एकत्र येऊन गणेशोत्सव साजरा करतात. महत्त्वाचे म्हणजे, नवी मुंबईमध्ये ५० हजार घरांमध्ये गणरायाचे आगमन होत असते. ५०० पेक्षा जास्त सार्वजनिक मंडळे आहेत. असे असताना आग्रोळी गावाने मात्र सामाजिक ऐक्य आणि सामूहिक श्रद्धेचा नवीन आदर्श निर्माण केला आहे.