तुंबलेल्या पाण्याचा प्रश्न मिटला

अंबरनाथ, ता. ३० (वार्ताहर) : श्री कच्छी वीसा ओसवाल जैन संघ परिसरातील जैन मंदिरात पावसाळ्यात साचणाऱ्या पाण्यामुळे निर्माण होणाऱ्या समस्येवर तातडीने उपाययोजना करून मोठा दिलासा मिळाला आहे. माजी नगराध्यक्ष सुनील चौधरी आणि माजी नगरसेवक कुणाल भोईर यांनी गुरुवारी सायंकाळी पाहणी करून कार्यवाही केली. जैन समाजाच्या पर्युषण महापर्वातील क्षमापना दिनानिमित्त या तातडीच्या उपाययोजनेचे महत्त्व अधिक अधोरेखित झाले.
जैन मंदिर परिसरात सीसीटीव्ही वाहिन्या टाकण्यासाठी पेव्हर ब्लॉक काढल्याने रस्त्यावर खड्डे पडले होते. त्यातच जवळील कचराकुंडी आणि पुनर्बांधणीच्या कामामुळे रस्त्यांवर अडथळे निर्माण झाले होते. परिणामी, पावसाचे पाणी साचून घाणीची समस्या गंभीर झाली होती. या तक्रारीची दखल घेत चौधरी व भोईर यांनी पाहणी केली आणि सीसी रोडलगतचे पेव्हर ब्लॉक काढून पाणी थेट गटारात जाण्याची व्यवस्था केली. त्यामुळे तुंबलेल्या पाण्याचा प्रश्न तातडीने सुटला. या वेळी माजी नगरसेवक स्वप्नील बागुल, जयंती नागडा, परेश शाह, खांजी धल, हसमुखभाई हरिया, मयूर विसरिया, सुरेश मोता, मीकिन गाला, अरुण वोरा, सुरेंद्र हरिया, निक्षित शाह, जयेश देढिया आदी मान्यवरांसह जैन समाजातील नागरिक उपस्थित होते. भविष्यात परिसरातील कचराकुंडी हटवली जाईल आणि सीसीटीव्ही वाहिनीसाठी खोदलेला रस्ता नवीन पेव्हर ब्लॉक्स लावून दुरुस्त करण्यात येईल, असे नगरपालिका प्रशासनाने आश्वासन दिले