विभागीय कोकण भवन आयुक्त कार्यालयात संविधान परिचय कार्यशाळा

विभागीय कोकण भवन आयुक्त कार्यालयात संविधान परिचय कार्यशाळा
खारघर, ता. ३० (बातमीदार) ः सीबीडी बेलापूर येथील कोकण विभागीय आयुक्त कार्यालयात नुकतीच संविधान परिचय कार्यशाळा उत्‍साहात पार पडली. या कार्यशाळेत अधिकारी व कर्मचारी मोठ्या संख्येने उपस्थित होते.
भारतीय संविधानाच्या ७५व्या वर्धापनदिनानिमित्त संपूर्ण देशभरात संविधान अमृत महोत्सव साजरा केला जात आहे. त्याच अनुषंगाने अमृतमहोत्सवी संविधान पर्वाच्या भाग म्हणून नवी मुंबई महापालिकेच्या वतीने नागरिकांना संविधान साक्षर करण्यासाठी विविध उपक्रम राबविण्यात येत आहेत. यामध्ये घराघर संविधान अभियान, जागरूकता कार्यक्रम आणि कर्मचारी प्रशिक्षण कार्यशाळा यांचा समावेश आहे. विभागीय कोकण भवनातील कार्यशाळेत संविधान अभ्यासक सुरेश सावंत यांनी उपस्थित अधिकारी आणि कर्मचाऱ्यांना संविधानाचे मूल्य, अधिकार आणि त्याचे महत्त्व याविषयी सखोल माहिती दिली. त्यांनी संविधानाच्या मूलभूत तत्त्वांचा आणि नागरी कर्तव्यांचा अभ्यास करून उपस्थितांना मार्गदर्शन केले. या उपक्रमाद्वारे कर्मचाऱ्यांमध्ये संविधानाबाबत जागरूकता वाढविणे हे प्रमुख उद्दिष्ट होते. कार्यशाळेत कोकण विभाग सामान्य प्रशासन विभागाचे तहसीलदार नरेश जगताप यांच्यासह इतर अधिकारी, कर्मचारी उपस्थित होते. तसेच नवी मुंबई महापालिकेच्या समाजविकास विभागाचे समाजसेवक दशरथ गंभीरे, समूह संघटिका प्रतीक्षा काळे, समूहसंघटक विजय चव्हाण, मनोहर राऊत आणि जी. आर. चव्हाण यांनीही कार्यक्रमात सहभाग घेतला. या उपक्रमामुळे विभागीय अधिकारी, कर्मचारी संविधानाबद्दल अधिक साक्षर झाले असून, त्यांच्या दैनंदिन कामकाजात नागरिकांना संविधानाच्या अधिकारांबाबत मार्गदर्शन करता येईल, असा विश्वास व्यक्त केला जात आहे.