मोबाईल चोरटा जेरबंद; साथीदार फरार

मोबाईल चोरटा जेरबंद
ठाणे रेल्वेस्थानकातील घटना
सकाळ वृत्तसेवा
ठाणे, ता. ३० : छत्री बॅगेत ठेवण्यासाठी मोबाईल सिमेंटच्या कट्ट्यावर ठेवणाऱ्या डॉक्टरचा मोबाईल चोरील गेला होता. याप्रकरणी नाशिक येथील रूपसिंग सुरविया (वय २९) या चोरट्याला लोहमार्ग पोलिसांनी अटक केली. ही घटना शुक्रवारी (ता. २९) दुपारच्या सुमारास ठाणे रेल्वेस्थानकातील फलाट क्रमांक पाचवर घडली.
श्रद्धा मोरे या ठाण्यात एका खासगी हॉस्पिटलमध्ये डॉक्टर म्हणून नोकरी करतात. शुक्रवारी घरी जाण्यासाठी ठाणे रेल्वेस्थानकात सिमेंटच्या ओट्यावर बसल्या होत्या. त्या वेळी त्यांनी हातातील मोबाईल बाजूला ठेवून छत्री बॅगेत ठेवली. याचदरम्यान मोबाईल त्यांच्या बाजूला बसलेल्या अनोळखी व्यक्तीने उचलून त्याच्या साथीदाराकडे दिला व तो तिथून पळून गेला. हा प्रकार पाहिल्यावर मोरे यांनी आरडाओरडा केल्यावर बाजूला बसलेल्या रूपसिंग याला ठाणे लोहमार्ग पोलिसांनी पकडले. या घटनेत डॉ. मोरे यांचा १६ हजार रुपये किमतीचा मोबाईल फोन चोरीला गेल्याचे तक्रारीत नमूद करण्यात आले आहे. त्यानुसार गुन्हा दाखल झाला आहे.