खड्ड्यात दुचाकी पडून स्वाराचा मृत्यू

शहापूर, ता. ३० (वार्ताहर) : मुंबई-नाशिक महामार्गावर पडलेल्या मोठमोठ्या खड्ड्यांमुळे एका दुचाकीस्वाराचा मृत्यू झाला आहे. त्याच्यासोबतचा आणखी एक जण गंभीर जखमी झाल्याची घटना आसनगाव रेल्वे पुलाजवळ शनिवारी (ता. ३०) संध्याकाळी घडली. या घटनेमुळे महामार्गावर पडलेल्या खड्ड्यांविरोधात वाहनचालकांमधून तीव्र संताप व्यक्त केला जात आहे.

मुंबई-नाशिक महामार्गावरील मुंबई वाहिनीवरून वासिंद येथून दुचाकीवरून शहापूर दिशेला घरी जाताना आसनगाव येथे पडलेल्या खड्ड्यांमध्ये दुचाकी जोरात आदळून पडली. यामध्ये दुचाकीवर पाठीमागे बसलेल्या प्रकाश बोंद्रे (वय ४०) यांच्या डोक्याला गंभीर दुखापत झाल्याने त्यांचा जागीच मृत्यू, तर रघुनाथ वेखंडे जखमी झाले असून, त्यांना शहापूर उपजिल्हा रुग्णालयात प्राथमिक उपचार केल्यानंतर पुढील उपचारांसाठी ठाणे येथे हलविण्यात आले आहे. दरम्यान, मुंबई-नाशिक महामार्गावर अनेक ठिकाणी खड्ड्यांचे साम्राज्य पसरले असून, अपघातांसह खड्ड्यांमुळे वाहनात बिघाड होण्याच्या घटना घडत आहेत. वाहतूक ठप्प होण्याचे प्रकारही होत आहेत.