जया साधवानी शिवसेना सिंधी सेलच्या समन्वयकपदी

उल्हासनगर, ता. ३० (बातमीदार) : काँग्रेसच्या माजी उपमहापौर आणि महिला आघाडीच्या महाराष्ट्र प्रदेश उपाध्यक्ष राहिलेल्या जया साधवानी यांनी नुकताच शिवसेना (शिंदे गट)मध्ये प्रवेश केला होता. सिंधी समाजातील त्यांचे प्रभावी व्यक्तिमत्त्व लक्षात घेऊन उपमुख्यमंत्री एकनाथ शिंदे यांनी त्यांच्यावर सिंधी सेलच्या राज्य समन्वयक पदाची जबाबदारी सोपवली आहे. शिवसेना सचिव संजय मोरे यांनी पाठवलेल्या नियुक्तीपत्रात साधवानी यांची एक वर्षासाठी या पदावर नियुक्ती करण्यात येत असल्याचे नमूद केले आहे. बाळासाहेब ठाकरे यांचा हिंदुत्वाचा विचार आणि धर्मवीर आनंद दिघे यांची शिकवण यांचा प्रसार करत पक्ष संघटन मजबूत करण्याचे आवाहनही त्यात करण्यात आले आहे.