चिंचपोकळीत ‘कलियुगातील समुद्रमंथन’

चिंचपोकळीत ‘कलियुगातील समुद्रमंथन’
प्लॅस्टिक कचऱ्यामुळे सागरी जैवविविधता संकटात
शिवडी, ता. ३१ (बातमीदार) ः दिवसेंदिवस वाढीस लागलेल्या प्लॅस्टिकच्या कचऱ्यामुळे समुद्राला धोका निर्माण झाला आहे. सागरी जैवविविधता जणू संकटात सापडली आहे. या सागराची व्यथा सांगणारा देखावा दरवर्षीप्रमाणे यंदाच्या गणेशोत्सवात चिंचपोकळी आर्थर रोड येथील आनंद इस्टेट येथे राहणाऱ्या श्रवण घोडके यांच्या घरी साकारण्यात आला आहे.
घरगुती गणेश सजावटीत ‘कलियुगातील समुद्रमंथन’ या विषयावर आधारित समाजप्रबोधन करणारा देखावा श्रवण घोडके, एकता पेडणेकर, तनुश्री बांगर, विक्रम-निकिता जाधव, सागर दळवी, निखिल सावंत, ऋषिकेश कदम, साम गांगण, कल्पेश सावंत, रोहन सावंत आणि मित्र परिवारांनी मिळून साकारला आहे. संपूर्ण सजावट पर्यावरणपूरक आहे. कागदपत्रे, गोंद, टाकाऊ पुठ्ठे, माती, वाळू, वर्तमानपत्रे, रंग या साहित्याचा वापर केलेला असून बाप्पाची मूर्ती पर्यावरणपूरक शाडूच्या मातीपासून मूर्तिकार विनोद शिंदे व सहकाऱ्यांनी साकारली आहे. कला दिग्दर्शन रोहन सावंत व सहकारी यांनी केले आहे.