जुनी वाहने खरेदी-विक्रीची माहिती अनिवार्य

जुनी वाहने खरेदी-विक्रीची माहिती अनिवार्य
गुन्ह्यांमध्ये वाढत्या वापरामुळे जिल्‍हाधिकाऱ्यांचा निर्णय
अलिबाग, ता. ३१ (वार्ताहर) ः जिल्ह्यात दहशतवादी कारवाया व गंभीर गुन्ह्यांमध्ये चोरीच्या वाहनांचा वाढता वापर लक्षात घेता, जिल्हाधिकारी किशन जावळे यांनी आदेश जारी केला आहे. यापुढे जिल्ह्यातील सर्व नगरपालिका व ग्रामपंचायत हद्दीत जुनी वाहने खरेदी-विक्री करणाऱ्या व्यावसायिकांना वाहनांचा संपूर्ण तपशील स्थानिक पोलिस ठाण्यात नोंदवणे बंधनकारक असणार आहे. या आदेशाचे उल्लंघन करणाऱ्यांविरोधात दंडात्मक कारवाई करण्यात येणार आहे.
पोलिसांच्या अहवालानुसार, जिल्ह्यात जुन्या वाहनांच्या खरेदी-विक्रीचा मोठ्या प्रमाणावर व्यवसाय सुरू आहे. वाहन दुरुस्तीची दुकाने, लहान गॅरेज तसेच खासगी व्यापाऱ्यांकडून मोटारसायकली व इतर वाहने विक्रीस येत असतात. परंतु या व्यवहाराचा सविस्तर तपशील न ठेवल्याने चोरीच्या वाहनांची देवाणघेवाण वाढत आहे. देशातील विविध दहशतवादी कारवायांमध्ये चोरीच्या मोटारसायकलींचा वापर झाल्याची उदाहरणे नोंदली गेली आहेत. गंभीर गुन्हे उघडकीस आणताना पोलिसांना वाहनांच्या मालकांचा व खरेदीदारांचा तपशील उपलब्ध नसल्याने तपासात अडचणी येतात. त्यामुळे आता यापुढे जुनी वाहने खरेदी-विक्री करणाऱ्या व्यावसायिकांनी प्रत्येक सात दिवसांनी स्थानिक पोलिस ठाण्याला व्यवहाराचा तपशील द्यावा लागणार आहे. या तपशिलात वाहन क्रमांक, इंजिन क्रमांक, चेसिस क्रमांक, मूळ मालकाचे नाव, कायमचा व सध्याचा पत्ता, मोबाईल क्रमांक, ओळखपत्र, आरसीटीसी बुक यांचा समावेश असणे बंधनकारक राहील. खरेदीदाराचे नाव, पत्ता, मोबाईल क्रमांक व ओळखपत्राची माहिती देणेदेखील आवश्यक असणार आहे. या आदेशाचे उल्लंघन करणाऱ्यांविरोधात कठोर कारवाई करण्यात येणार आहे. हा निर्णय सामान्य नागरिकांच्या सुरक्षिततेसाठी आणि कायदा-सुव्यवस्थेच्या दृष्टीने घेतला असून, त्यामुळे जुनी वाहने खरेदी-विक्री करणाऱ्या व्यापाऱ्यांनी नियमांचे पालन करावे, असे जिल्हाधिकारी किशन जावळे यांनी कळविले आहे.