आंतरजातीय विवाह केल्याच्या रागातून गोळीबार

उल्हासनगर, ता. १ (बातमीदार) : बहिणीसोबत आंतरजातीय प्रेमविवाह केल्याच्या रागातून तरुणाने मेव्हण्यावर गोळीबार केल्याची घटना बुधवारी (ता. २७) रात्री उल्हासनगरात घडली होती. गंभीररीत्या जखमी झालेल्या योगेश मिश्रा उर्फ बबड्या याचा पाच दिवस मृत्यूशी झुंज देऊन रविवारी (ता. ३१) मृत्यू झाला. याप्रकरणी मोनू शेख याच्यासह पाच जणांवर खुनाचा गुन्हा दाखल करण्यात आला आहे.

साईनाथनगर येथे धीरज विठ्ठले आणि त्याचा मित्र योगेश मिश्रा बसलेले होते. त्याच वेळी मोनू शेख आणि त्याच्या साथीदारांनी धीरजवर चाकूहल्ला केला, तर योगेशच्या छातीवर गोळी झाडली होती. योगेशने दोन वर्षांपूर्वी मोनूच्या बहिणीसोबत प्रेमविवाह केला होता. याच रागातून मोनूने हे कृत्य केले होते. योगेशला उपचारासाठी खासगी रुग्णालयात दाखल करण्यात आले होते. गोळीबारप्रकरणी जुनैद शेख, मोनू अलीहसन शेख, अभिमन्यू ओमप्रकाश पटेल, इकबाल वकील अहमद शेख, योगेश गणेश शिंपले (पाटील) यांना अटक केली आहे. या संशयित आरोपींवर गोळीबार केल्याप्रकरणी गुन्हा दाखल करण्यात आला होता, मात्र योगेश याचा मृत्यू झाल्याने खुनाचा गुन्हा नोंदवण्यात आला.