लोकशक्ती एक्स्प्रेसला अखेर सफाळे येथे थांबा

पालघर (बातमीदार) : कोरोना काळात सफाळे रेल्वेस्थाकावरील थांबा रद्द करण्यात आलेल्या लोकशक्ती एक्स्प्रेसचा थांबा मंजूर करण्यात आला आहे. त्यामुळे सफाळेकर प्रवासीवर्गाला पुन्हा एकदा रेल्वे दिलासा मिळाला आहे. व्यावसायिक, नोकरवर्ग, भाजीपाला विक्रेत्या यांच्यासाठी ही गाडी प्रवासासाठी उपयुक्त आहे. कोरोना काळात लोकशक्ती एक्स्प्रेसचा सफाळे येथील थांबा रद्द केला गेला होता. यामुळे पहाटे मुंबईकडे जाणाऱ्या प्रवासीवर्गाला अनेक अडचणींचा सामना करावा लागत होता. सफाळे व पंचक्रोशीमधील भाजीपाला, फूले, दूध व इतर गोष्टी वेळेवर पोहोचणे आवश्यक असताना रेल्वे नसल्याने वेळ, पैसा व मेहनत वाया जात होती. येथील प्रवासीवर्गाने गाडीचा थांबा मंजूर करावा, यासाठी खासदार डॉ. हेमंत सवरा यांच्याकडे तगादा लावला. नागरिकांची मागणी लक्षात घेत सवरा यांनी रेल्वेमंत्री अश्विन वैष्णव यांच्याकडे जूनमध्ये निवेदन देत ही मागणी लावून धरली व त्यासाठी पाठपुरावा केला होता.