अंबरनाथमध्ये अवैध दारूप्रकरणी तिघांना अटक

अंबरनाथ, ता. २ (वार्ताहर) : अंबरनाथ पश्चिम पोलिसांनी केलेल्या कारवाईत गावठी हातभट्टीची दारू वाहतूक आणि विक्री करताना तिघा आरोपींना अटक करण्यात आली आहे. त्यांच्याकडून दारू व दुचाकी जप्त केली असून, महाराष्ट्र दारूबंदी कायद्यान्वये गुन्हा दाखल केला आहे. ही घटना सोमवारी (ता. १) सायंकाळी साडेसातच्या सुमारास डीएमसी कल्याण–कर्जत रोडवरील डीएमसी कॉर्नर येथे घडली. पोलिसांच्या माहितीनुसार, प्रवीण भालेराव (२०), सुजय विश्वास (२२) आणि पुरुषोत्तम गावड (३३) हे दुचाकीवरून अवैध दारूची वाहतूक करत होते. पोलिसांनी कारवाई करून तिघांना ताब्यात घेतले. त्यांच्याकडून दारू आणि दुचाकी जप्त केली. याप्रकरणी अंबरनाथ पोलिस ठाण्याचे उपनिरीक्षक अपेक्षा जाधव यांनी गुन्हा दाखल केला असून, पुढील तपास पोलिसांकडून सुरू आहे.