११ वर्षीय मुलाचा विजेच्या धक्क्याने मृत्यू

११ वर्षीय मुलाचा विजेच्या धक्क्याने मृत्यू

बोईसर, ता. १ (बातमीदार) : गणेशनगर परिसरातील साई लोकनगर येथे सोमवारी (ता. १) दुपारच्या सुमारास एका अल्पवयीन मुलाचा विजेचा धक्का लागल्याने मृत्यू झाल्याची घटना घडली. आयुष अनिल पांडे (वय ११) असे मृत मुलाचे नाव आहे. आयुष घरात पाणी भरत असताना मोटार बंद करण्यासाठी गेला होता. या वेळी प्लग काढण्याचा प्रयत्न करताना त्याला जोरदार विजेचा धक्का बसला. त्याच वेळी खाली पाणी साचलेले असल्याने विजेचा प्रवाह वाढला आणि दुर्घटना घडली, अशी प्राथमिक माहिती मिळत आहे. आयुष हा आई-वडिलांचा एकुलता एक मुलगा होता. त्याच्या मृत्यूमुळे पांडे कुटुंबावर दुःखाचा डोंगर कोसळला असून परिसरात हळहळ व्यक्त होत आहे. पोलिसांनी घटनास्थळी पंचनामा करून पुढील तपास सुरू केला आहे.