३५० कर्मचाऱ्यांना पगाराची प्रतीक्षा

मोहिनी जाधव : सकाळ वृत्तसेवा
बदलापूर, ता. ३ : सरकारच्या निर्णयाप्रमाणे प्रत्येक महिन्याच्या २६ तारखेच्या आत शासकीय कर्मचाऱ्यांना पगार मिळणे अपेक्षित आहे. असे असताना सरकारकडून निधी न आल्यामुळे अद्यापही कुळगाव बदलापूर नगरपालिकेच्या एकूण ३५० कर्मचाऱ्यांचा पगार रखडला आहे. काही महिन्यांपासून निधी येत नसल्याची माहिती पालिका प्रशासनाकडून मिळाली आहे. त्यामुळे लाडक्या बहिणींना खूश करता करता, पगार न मिळाल्याने लाडके भाऊ मात्र नाराज झाले आहेत.

कुळगाव बदलापूर ही ब वर्गाची नगरपालिका असून एकूण ३५० कर्मचारी सेवा बजावत आहेत. राज्य सरकारच्या जीआरप्रमाणे प्रत्येक महिन्याच्या २६ तारखेच्या आत कर्मचाऱ्यांचा पगार बँक खात्यात जमा करणे अनिवार्य आहे. मात्र, नगरपालिकेच्या कर्मचाऱ्यांना आता सप्टेंबरची ३ तारीख आली तरी ऑगस्टचा पगार अद्याप मिळालेला नाही. बऱ्याचशा कर्मचाऱ्यांचा बँकेतील ईएमआय आणि इतर देणी आहेत. पगार उशिरा झाल्यामुळे बँक कर्जधारकांना दंड बसवते. त्यामुळे या कर्मचाऱ्यांचे महिन्याचे आर्थिक गणित विस्कटून जाते. पालिकेच्या लेखापाल विभागातून तीन ते चार दिवसांपासून पगार उद्या येईल, असे सांगितले जात आहे. पगार न आल्याने संतप्त कर्मचाऱ्यांनी मुख्याधिकारी दालनाबाहेर घेराव घातला. कर्मचाऱ्यांच्या वतीने शिष्टमंडळांनी मुख्याधिकारी मारुती गायकवाड यांची भेट घेत चर्चा केली. यावर सरकारकडून अद्याप सहाय्यक अनुदान आले नसल्याने पगाराला उशीर होत असल्याचे सांगितले. प्रमुख लेखापाल विलास चव्हाण यांनी सरकारच्या योजना आणि त्यावर खर्च होणारा पैसा यामुळे सरकारकडून कर्मचाऱ्यांसाठी येणारा निधी उशिरा येत असल्याने ही तफावत जाणवत असल्याचे सांगितले.

सरकारच्या निर्णयाप्रमाणे महिन्याच्या २६ तारखेच्या आत पगार देणे गरजेचे आहे. मात्र, सप्टेंबरची ३ तारीख येऊनही ऑगस्टचा पगार मिळालेला नाही. दोन दिवसांत पगार मिळाला नाही, तर सरकारविरुद्ध आंदोलन पुकारू.
- लक्ष्मण कुडव, पालिका कर्मचारी

आम्ही सरकार दरबारी अनेक पत्रव्यवहार केलेले आहेत. अद्याप पालिकेकडे सरकारचा सहाय्यक निधी आलेला नाही. यापूर्वीही पालिका कर्मचाऱ्यांचा दोन महिन्यांचा पगार पालिका फंडातून दिला आहे. आता पालिका फंडावर याचा मोठा ताण पडत असल्याने सरकारचा सहाय्यक निधी आल्यानंतर लगेचच पालिका कर्मचाऱ्यांचा पगार अदा केला जाईल.
- विकास चव्हाण, लेखापाल
कुळगाव बदलापूर नगरपालिका

बदलापूर : पालिकेतील संतप्त कर्मचाऱ्यांनी मुख्याधिकारी दालनाबाहेर घेराव घातला.