पोलिस उपआयुक्त परिमंडळ दोनचे कार्यालय एनआरआय पोलिस ठाण्यात

पोलिस उपआयुक्त परिमंडळ दोनचे कार्यालय एनआरआय पोलिस ठाण्यात
नवी मुंबई, ता. ३ (वार्ताहर) : नवी मुंबई पोलिस आयुक्तालयात नव्याने निर्माण करण्यात आलेल्या पोलिस उपआयुक्त, परिमंडळ-२, बेलापूरचे नवे कार्यालय बेलापूर येथील एनआरआय सागरी पोलिस ठाण्यात पहिला मजल्यावर सुरू करण्यात आले आहे. या कार्यालयाचे उद्घाटन १ सप्टेंबर रोजी पोलिस आयुक्त मिलिंद भारंबे यांच्या हस्ते करण्यात आले.
यावेळी विशेष अतिथी म्हणून सह पोलिस आयुक्त संजय येनपुरे, अपर पोलिस आयुक्त (गुन्हे) दीपक साकोरे, पंकज डहाणे (डीसीपी परिमंडळ १), प्रशांत मोहिते (डीसीपी परिमंडळ ३), संजयकुमार पाटील (डीसीपी मुख्यालय), सचिन गुंजाळ (डीसीपी गुन्हे शाखा), तिरूपती काकडे (डीसीपी वाहतूक), व रश्मी नांदेडकर (डीसीपी विशेष शाखा) हे वरिष्ठ अधिकारी उपस्थित होते. नवी मुंबई पोलिस आयुक्तालयातील पोलिस उप आयुक्त परिमंडळ-१ (वाशी) व परिमंडळ-२ (पनवेल) यांचे विभाजन करून शासनाने २३ जुलै रोजी पोलिस उप आयुक्त, परिमंडळ-२, बेलापूर हे नवे परिमंडळ निर्माण केले आहे. या नव्या परिमंडळाचे पहिले पोलिस उप आयुक्त म्हणून अमित काळे यांनी २४ जुलै रोजी पदभार स्वीकारला. परिमंडळ २ चे नवे कार्यालय एनआरआय सागरी पोलिस ठाण्यात सुरू करण्यात आले आहे. नव्याने निर्माण झालेल्या परिमंडळ-२ मध्ये सीबीडी विभाग व पोर्ट विभाग या दोन सहाय्यक पोलिस आयुक्तांचा समावेश आहे. सीबीडी विभागात नेरूळ, सीबीडी, एनआरआय सागरी व प्रस्तावित विमानतळ पोलिस ठाणे तर पोर्ट विभागात उलवा, न्हावाशेवा, उरण व मोरा सागरी पोलीस ठाणे असे एकूण आठ पोलिस ठाण्यांचा समावेश आहे. पोलिस उप आयुक्त, परिमंडळ-२, बेलापूर कार्यालयात पोलिस उप आयुक्त यांना भेटण्याची वेळ सोमवार ते शुक्रवार सायंकाळी ४ ते ६ वाजेपर्यंत ठेवण्यात आली आहे.