मनोरच्या शाळेत चोरीचा प्रयत्न

मनोर, ता. ३ (बातमीदार) : नवी बस्ती परिसरातील अली अल्लाना इंग्लिश हायस्कूलमध्ये चोरीची घटना उघडकीस आली आहे. शाळा व्यवस्थापन कार्यालयाच्या दरवाजाचे कुलूप फोडून कार्यालयात शिरून बुधवारी (ता. ३) पहाटे अडीच वाजण्याच्या सुमारास चोरीचा प्रयत्न झाला. ही घटना शाळेतील सीसीटीव्ही चित्रीकरणामध्ये दिसून येत आहे. याप्रकरणी गुन्हा दाखल करण्यात आला आहे. शाळा व्यवस्थापन कार्यालयात शिरलेल्या चोरांनी लाकडी टेबलाचा खण तोडण्याचा प्रयत्न केला होता. शाळेत शिरलेल्या चोरांनी रेनकोट व चड्डी परिधान केलेली असल्याची माहिती सुरक्षा रक्षकांनी पोलिसांना दिली. याप्रकरणी मनोर पोलिसांकडून तपास सुरू करण्यात आला असून चोरांचा शोध घेतला जात आहे.