जुन्या वादातून एकाला कारने चिरडले

जुन्या वादातून एकाला कारने चिरडले
एकाचा मृत्यू तर एक जखमी; चौघांविरोधात गुन्हा दाखल

सकाळ वृत्तसेवा
ठाणे, ता. ३ : वन जमिनीवरील जुन्या वादातून दोन कुटुंबीयांच्या वादानंतर झालेल्या शिवीगाळ आणि हाताबुक्कीनंतर संतोष पवार या तरुणाने दोघांना कारने चिरडल्याची घटना मंगळवारी (ता. २) रात्री वागळे इस्टेट रोड नंबर २७ येथे घडली. यामध्ये विठ्ठल गायकर या तरुणाचा मृत्यू झाला असून शंकर वरठे हा जखमी झाला आहे. याप्रकरणी चौघांविरोधात गुन्हा दाखल करण्यात आली असून एकाला श्रीनगर पोलिसांनी ताब्यात घेतले आहे. मृत विठ्ठल गायकर हा शिवसेना (शिंदे गटाचा) कार्यकर्ता होता.

जखमी तक्रारदार शंकर वरठे (वय ५२) हे त्यांचे मामे भाऊ बाबू बरफ आणि मित्र वसंत टोकरे तसेच विठ्ठल गायकर असे चौघे जण मंगळवारी (ता. २) रात्री साडेआठ वाजण्याच्या सुमारास वागळे इस्टेट रोड नंबर २७ येथील हॅप्पी मॅन पुतळ्यासमोर चहा पिण्यासाठी आले होते. याचदरम्यान त्याच परिसरात राहणारे संतोष पवार, महेश पवार, अमित पवार आणि महेश पाटील हे चौघे त्या ठिकाणी आले. त्या चौघांनी जुन्या भांडणाच्या वादातून वसंत आणि बाबू या दोघांना शिवीगाळ करून हाताबुक्क्यांनी मारहाण केली. या वेळी कारमध्ये बसलेल्या संतोष याने रागाच्या भरात कार समोर उभ्या असलेल्या विठ्ठल गायकर याच्या अंगावर चढविली. त्यानंतर कार दोन-तीन वेळा मागेपुढे करत विठ्ठल याला चिरडले. यामध्ये विठ्ठलला वाचविण्यासाठी गेलेल्या शंकर वरठे यांच्या अंगावरही संतोषने कार चढवून त्याला जखमी केले. यानंतर संतोषने घटनास्थळावरून पळ काढला. यामध्ये गंभीररीत्या जखमी झालेल्या विठ्ठलला जिल्हा शासकीय रुग्णालयात दाखल करण्यात आले; मात्र तेथील डॉक्टरांनी त्याला मृत घोषित केले. यामध्ये जखमी शंकर यांच्या छातीला आणि पायाला गंभीर दुखापत झाल्याचे तक्रारीत नमूद करण्यात आले आहे.

एक जण ताब्यात
श्रीनगर पोलिसांनी आरोपींविरोधात गुन्हा दाखल केला असून याप्रकरणी चौघांपैकी एकाला ताब्यात घेतल्याची माहिती श्रीनगर पोलिसांनी दिली. या प्रकरणाचा पुढील तपास वरिष्ठ पोलिस निरीक्षक गुलझारीलाल फडतरे यांच्या मार्गदर्शनाखाली सुरू आहे.