पोलिसास मारहाण करणाऱ्या चार जणांच्या टोळक्याला अटक

पोलिसाला मारहाण करणाऱ्या चौघांना अटक

भिवंडी, ता. ३ (वार्ताहर) : पोलिस हवालदाराला मारहाण करून त्यांचा मोबाईल जबरीने हिसकावून नेणाऱ्या चौघा जणांच्या टोळक्याला शांतीनगर पोलिसांना बुधवारी (ता. ३) अटक केली.
धीरज रामचंद्र भोये (वय २१), हितेश दिलीप भोये (२१), बळीराम रामदास चौधरी (२३), नितीन उर्फ सुशांत सुरेश लाहरे (२३) सर्व राहमार जव्हार, पालघर अशी आरोपींची नावे आहेत. कोनगाव पोलिस ठाण्यात पोलिस हवालदार म्हणून कार्यरत असलेले सुनील पाटील हे २७ ऑगस्ट रोजी मध्यरात्रीच्या सुमारास घरी परतत असताना पाऊस आल्याने ते कल्याण बायपास रस्त्यावरील एका दुकानाच्या आडोशाला उभे राहिले. या वेळी दुचाकीवरून आलेल्या धीरजने सुनील यांच्यासोबत पार्किंगवरून वाद घातला आणि आपणही पोलिस असल्याची बतावणी करून धमकावले, धीरजने इतर तीन साथीदारांना बोलावून हा पोलिस असल्याचे सांगत सुनील पाटील यांना मारहाण करण्यास सुरुवात केली. तसेच पाटील यांच्या खिशातील मोबाईल हिसकावून घेत त्यांना लाकडी दांडक्याने मारहाण केली. त्या वेळी तेथे उभ्या असलेल्या एका रिक्षाची काच आरोपींनी सुनील पाटील यांच्या तोंडावर मारली, तर चाकू दाखवीत तेथे मदतीसाठी येणाऱ्यांना धमकावून तेथून आरोपींनी पळ काढला.

गुन्ह्याचे गांभीर्य ओळखून तांत्रिक तपास करत, गुप्त बातमीदारांमार्फत मिळालेल्या माहितीनुसार पोलिसांनी आरोपींची ओळख पटवली. त्यानंतर चौघांनाही ताब्यात घेऊन अटक केली. त्यांच्याकडून १० हजार रुपये किमतीचा मोबाईल, ९० हजार रुपये किमतीच्या दोन दुचाकी, असा एकूण एक लाख रुपयांचा मुद्देमाल जप्त केला.