नलिनी कुलकर्णी यांचे निधन

नलिनी कुलकर्णी यांचे निधन

शहापूर, ता. ३ : सर्जनशील लेखिका आणि निवृत्त शिक्षिका नलिनी कुलकर्णी (सरदेशमुख) यांचे नुकतेच वयाच्या ९०व्या वर्षी शहापूर येथे निधन झाले. त्या यापूर्वी मुंबईत गोरेगाव येथे राहत होत्या. त्यांच्या पश्चात मुलगी जोत्स्ना मूळावकर, जावई, नातू निनाद मूळावकर, नातसून असा परिवार आहे.
त्या मुलांच्या लाडक्या शिक्षिका होत्या. काही वर्षे त्या ‘आकाशवाणी मुंबई’वर ‘गंमतजंमत’ कार्यक्रम सादर करायच्या. शास्त्रीय संगीतावर त्यांचे मनस्वी प्रेम होते. त्या सतार वाजवत असत. कुलकर्णी यांनी ‘जागर’ नावाचे हस्तलिखित २५ वर्षे सातत्याने प्रकाशित केले. इंडिया बुक ऑफ रेकॉर्डमध्ये त्यांची नोंद झाली आहे. त्यांच्या ‘जागर’ अंकाचे अनेक मान्यवर साहित्यिकांनी कौतुक केले होते. तसेच त्यांच्या दिवाळी अंकाला पुरस्कारांनी गौरविण्यात आले होते. साहित्य सेवा म्हणून त्या हा अंक विनामूल्य वितरित करीत असत. गोरेगावच्या अत्रे कट्ट्यावर त्यांनी विविध विषयांवर व्याख्याने दिली. अवघड दुखणी सोसतानाही प्रसन्न चेहरा ठेवत, सतत नवीन शिकत, काहीतरी कल्पकतेने कलाकृती घडवत असत. जो सहवासात येईल त्याला सकारात्मक आनंदी विचारांचे अत्तर लावणाऱ्या या कलासक्त जीवनाची आनंदयात्रा अखेर संपली.