भिवंडीत एकाच रात्रीत चार चोरीच्या घटना

भिवंडी, ता. ३ (बातमीदार) : भिवंडीत चोरीच्या घटनांमध्ये वाढ होत आहे. एकाच रात्रीत चोरी आणि घरफोडीच्या चार मोठ्या घटनांमुळे शहरवासीयांमध्ये भीतीचे वातावरण निर्माण झाले आहे. पोलिसांनी सर्व प्रकरणांमध्ये अज्ञात आरोपींविरुद्ध गुन्हा दाखल करून तपास सुरू केला आहे.
पहिली घटना शांतीनगर पोलिस ठाण्याच्या हद्दीत उघडकीस आली. अरिहंत सोसायटीतील तळमजल्यावर असलेल्या वैद्यकीय व्यावसायिक संदीप दुबे यांच्या मेडिकल स्टोअरचे कुलूप चोरट्यांनी फोडत रोख रक्कम आणि औषधांचा माल लुटून पळ काढला. सकाळी दुकान उघडताच दुबे यांच्या लक्षात आल्यानंतर त्यांनी तत्काळ पोलिसांत तक्रार दिली.
दुसरी घटना कोनगाव परिसरातील जमुनाई अपार्टमेंटमध्ये घडली. रहिवासी अमोल परदेशी यांच्या घरात काम करणाऱ्या रश्मी देवरेकर या महिलेने ४८ हजार रुपये रोख चोरून नेले. संबंधित महिलेने विश्वासाचा फायदा घेत पैसे घेऊन पळ काढला.
तिसरी घटना नारपोली पोलिस ठाण्याच्या हद्दीत घडली. आनंदनगर येथील उन्नती वूड्स सोसायटीचे रहिवासी हिरोजी राणे यांनी दिलेल्या फिर्यादीनुसार, त्यांच्या कंपनीच्या आवारात ठेवलेल्या तब्बल ३९ लाख ६५ हजार रुपयांच्या किमतीच्या ॲल्युमिनियम मेवन प्लेट्स चोरट्यांनी पळवून नेल्या. चौथी घटना शहर पोलिस ठाण्यात नोंद झाली. मोहम्मद हारून हाशिम शेख यांची दुचाकी दुकानाबाहेरून चोरट्यांनी नेली. सकाळी गाडी गायब झाल्याचे लक्षात येताच त्यांनी पोलिसांत तक्रार दिली.

पोलिसांची धावपळ सुरू
एका रात्रीत चार चोरीच्या घटना घडल्याने पोलिसांची धावपळ सुरू झाली आहे. झोन-२ चे पोलिस उपायुक्त यांच्या मार्गदर्शनाखाली पथके सक्रिय करण्यात आली असून, लवकरच गुन्हेगारांना पकडले जाईल आणि घटना उघडकीस आणली जाईल, असा दावा पोलिस अधिकाऱ्यांनी केला आहे.