स्वामीनगरमध्ये पद्मनाभस्वामी मंदिराचे दर्शन

अंबरनाथ, ता. ३ (बातमीदार) : स्वामीनगर सार्वजनिक गणेशोत्सव मंडळाने यंदाच्या गणेशोत्सवात दक्षिण भारतातील प्रसिद्ध श्री पद्मनाभस्वामी मंदिराचा देखावा उभारला आहे. हा भव्य देखावा भाविकांचे मुख्य आकर्षण ठरत आहे.
स्वामीनगर परिसरात दक्षिण भारतीयांची मोठी वस्ती असल्याने येथे विविध धार्मिक सण-उत्सवांमधून दक्षिणात्य भारतातील परंपरेचे दर्शन घडते. यंदा मंडळाने उभारलेल्या पद्मनाभस्वामी मंदिराच्या देखाव्यातून दक्षिणेतील पुरातन मंदिरांची अद्वितीय शैली अनुभवायला मिळत आहे. मंदिराच्या पिवळसर शिखर असलेल्या प्रवेशद्वारातून आत प्रवेश करताच जणू तामिळनाडू किंवा कर्नाटकातील प्राचीन देवस्थानात गेल्याचा भास होतो. दगडी कोरीव खांब, मोहक शिल्पं, लांबच लांब दालने आणि मंद प्रकाश या सर्वांनी भाविकांना भक्तीमय वातावरणाचा अनुभव मिळत आहे. गाभाऱ्यात भगवान विष्णूची भव्य मूर्ती असून, त्यालगतच गणरायाची देखणी मूर्ती विराजमान आहे. त्यामुळे भाविक प्रथम मंदिराच्या नयनरम्य देखाव्यात तल्लीन होत, पुढे गणपती बाप्पाच्या चरणी नतमस्तक होत आहेत.

देखाव्यासाठी सखोल अभ्यास
देखाव्यासाठी मंडळाच्या पदाधिकाऱ्यांनी स्वतः मेहनत घेतली आहे. दोन महिने आधीच दक्षिण भारतातील पुरातन मंदिरांना भेट देऊन पद्मनाभस्वामी मंदिराची निवड करण्यात आली. प्रत्यक्ष मंदिरातील शिल्प, कोरीवकाम यांचा सखोल अभ्यास करून आराखडा तयार करण्यात आला. पर्यावरणपूरक कापड आणि लाकूड वापरून हा देखावा साकारल्याची माहिती मंडळाचे सदस्य मणिमारन यांनी दिली.