‘श्री गणेशा आरोग्याचा’ अभियानाला प्रतिसाद

पालघर, ता. ४ (बातमीदार) : मुख्यमंत्री सहाय्यता निधी व धर्मादाय रुग्णालय मदत कक्षामार्फत सुरू करण्यात आलेले ‘श्री गणेशा आरोग्याचा’ अभियान यशस्वीपणे राबविण्यात येत आहे. या उपक्रमाअंतर्गत शेकडो आरोग्य शिबिरे जिल्ह्यातील विविध ठिकाणी आयोजित करण्यात आली आहेत. जिल्ह्यातील प्राथमिक आरोग्य केंद्रे, ग्रामीण रुग्णालये, उपजिल्हा रुग्णालये, वसई-विरार महापालिकेची रुग्णालये, तसेच विविध खासगी रुग्णालये यांच्या सहकार्याने या शिबिरांचे आयोजन करण्यात आले आहे.

या अभियानाचा लाभ घेताना आतापर्यंत हजारो नागरिकांनी तपासण्या करून घेतल्या असून, गरजू व आर्थिकदृष्ट्या दुर्बल रुग्णांसाठी हे अभियान खऱ्या अर्थाने आशीर्वाद ठरत आहे. या अभियानाद्वारे नागरिकांना मोफत तपासणी, निदान, सल्ला व उपचार सुविधा उपलब्ध करून दिल्या जात असून, आरोग्यविषयक जागरूकतेत वाढ होत असल्याचे चित्र दिसत आहे. हे अभियान पुढील काळात आणखी व्यापक स्वरूपात राबविण्यात येणार असून, अधिकाधिक नागरिकांनी याचा लाभ घ्यावा, असे आवाहन कक्षाचे वैद्यकीय अधिकारी डॉ. कृपेश बाबरेकर यांच्याकडून करण्यात आले आहे.