लोकलमध्ये चढताना मोबाईल चोरीला

लोकलमध्ये चढताना मोबाईल चोरीला
सकाळी वृत्तसेवा
ठाणे, ता. ४ : ठाणे स्थानकातून दादरला जाणाऱ्या जलद लोकलमध्ये चढताना मुंबईतील एका तरुणाचे दोन महागडे मोबाईल चोरट्यांनी गर्दीचा फायदा घेत लांबवले. चोरीला गेलेले दोन्ही मोबाईल मिळून ९५ हजार रुपयांचे होते. ही घटना मंगळवारी (ता. २) घडली असून ठाणे लोहमार्ग पोलिस तपास करीत आहेत.
मालाड येथे राहणारा तरुण सूरज मिश्रा (२७) हा मंगळवारी कामानिमित्त ठाण्यात आला होता. काम संपवून परत मालाड येथे घरी जाण्यासाठी तो रात्री ठाणे रेल्वेस्थानकावर फलाट क्रमांक सहावर आला. तेथून जलद दादर लोकलच्या मध्ये असलेल्या जनरल डब्यात गर्दीत तो चढला. त्याचदरम्यान गर्दीचा फायदा घेत दोन मोबाईल चोरट्यांनी चोरले. यामध्ये ६० हजार आणि ३५ हजार रुपये किमतीचे दोन मोबाईल फोन चोरीला गेल्याचे तक्रारीत म्हटले आहे. याप्रकरणी ठाणे लोहमार्ग पोलिस ठाण्यात गुन्हा दाखल करण्यात आला असून पुढील तपास लोहमार्ग पोलिस करीत आहेत.