पानटपरी चालकाने विसरलेले पाकीट दिले परत

पानटपरी चालकाने विसरलेले पाकीट दिले परत
रोहा, ता. ४ (बातमीदार) ः वाकण येथील पानटपरी चालक संतोष सोनी यांनी त्यांच्या टपरीवर विसरलेले पैशांचे पाकीट सुरक्षित ठेवून ते ग्राहकाला परत केले. या कृतीमुळे त्यांच्या प्रामाणिकतेचे सर्वत्र कौतुक होत आहे.
दापोली (रत्नागिरी) येथील उल्हास मदन साळगांवकर हे वाकण येथील पानटपरीवर आले होते. त्यांनी काही वस्तू खरेदी करून पुढील प्रवासाला सुरुवात केली. या वेळी ते आपले पैशांचे पाकीट तेथेच विसरले. सुकेळी खिंड येथे पोहोचल्यावर पोलिसांनी तपासणीसाठी लायसन्स मागितले, तेव्हा पाकीट हरवले असल्याचे त्यांच्या लक्षात आले. त्यांनी तत्काळ वाकणकडे परत येत शोध घेतला असता, पानटपरी चालक संतोष सोनी यांनी पाकीट सुरक्षित ठेवले होते. या पाकिटात सुमारे सात हजार रुपये रोख तसेच आधार कार्ड, पॅन कार्ड, लायसन्स यांसह महत्त्वाची कागदपत्रे होती. पाकीट परत मिळाल्याने उल्हास साळगांवकर यांनी आनंद व्यक्त करून सोनी यांचे आभार मानले. विशेष म्हणजे यापूर्वीही संतोष सोनी यांनी गणेशोत्सवाच्या काळात एका ग्राहकाचा ५० हजार रुपयांचा मोबाईल परत केला होता. या घटनेनंतर वाकण नाक्यावरील व्यापारी बांधव आणि ग्रामस्थांनी सोनी यांच्या प्रामाणिकतेचे कौतुक केले. पैशांसाठी प्रामाणिकता सोडली जात असणाऱ्या काळात अशा कृती समाजात सकारात्मक संदेश देणाऱ्या ठरत आहेत.