गणपती विसर्जनासाठी वाहतूक पोलिस सज्ज

गणपती विसर्जनासाठी वाहतूक पोलिस सज्ज
शहरात अवजड वाहनांना बंदी
ठाणे शहर, ता. ४ (बातमीदार) ठाणे पोलिस आयुक्तालयातील गणपती विसर्जनाकरिता वाहतुकीचे नियोजन करण्यासाठी वाहतूक पोलिस सज्ज झाले आहेत. विसर्जनाच्या दिवशी (ता. ६) पोलिस आयुक्तालयातील शहरात जड-अवजड वाहनांच्या वाहतुकीला बंदी करण्यात आली आहे. वाहतुकीच्या नियोजनाकरिता मनुष्यबळ वाढवण्यात आले असून, गणपती विसर्जन होईपर्यंत ते कर्तव्यावर असणार आहेत. विसर्जनाच्या दुसऱ्या दिवशी होणाऱ्या कोंडीचे नियोजन करण्यासाठीही वाहतूक पोलिसांनी नियोजन केले आहे.

दीड, पाच आणि सात दिवसांच्या गणपतींचे विसर्जन निर्विघ्न पार पडले आहे. आता दहाव्या दिवशी होणारे विसर्जन देखील सुरळीतपणे पार पडावे यासाठी पोलिस, पालिका आणि वाहतूक विभाग सज्ज झाले आहेत. न्हावा-शेवा बंदर, नाशिक, मुंबई आदी ठिकाणांहून ठाणे पोलिस आयुक्तालायच्या हद्दीतील शहरांमध्ये जड-अवजड वाहनांच्या प्रवेशामुळे मोठी कोंडी होते. त्यामुळे विसर्जनाच्या दिवशी या वाहनांच्या वाहतूक कोंडीचे विघ्न समोर येऊ नये, यासाठी वाहतूक विभागाने कंबर कसली आहे. या वाहनांना सकाळपासूनच शहरामधील रस्त्यांवर बंदी असणार आहे. न्हावा-शेवा बंदरामधून ठाणे, घोडबंदर मार्गे वसई, पालघर आणि गुजरातकडे जाणाऱ्या जड-अवजड वाहनांना सकाळी ८ ते दुसऱ्या दिवशी सकाळी ८ वाजेपर्यंत बंदी घालण्यात आली आहे. गुजरातकडे जाणाऱ्या या वाहनांना खारेगाव टोलनाकामार्गे पाठवले जाणार आहे.

पारसिक घाटाचा ताण कमी करणार
मुंबईतील काही भागांतील गणपती विसर्जनासाठी ठाण्यात येतात. या ठिकाणी पहाटे उशिरापर्यंत मूर्ती विसर्जन सुरू असते. त्यामुळे या घाटावर बंदोबस्तासाठी असलेल्या यंत्रणेवर मोठा ताण पडतो. परिणामी यंदा या घाटावरील होणारे विसर्जन कोलशेत घाटाकडेदेखील वळवण्यात येणार आहे.

सहा फुटांवरील मूर्त्यांचेच होणार विसर्जन
नैसर्गिक पाण्याच्या स्रोताच्या ठिकाणी केवळ सहा फुटांपेक्षा जास्त उंचीच्या असलेल्या मूर्तींचे विसर्जन केले जाणार आहे. त्यापेक्षा कमी उंचीच्या मूर्त्यांकरिता पालिकेने कृत्रिम तलाव निर्माण केले असून, तेथे त्यांचे विसर्जन होणार आहे. प्रदूषणाबाबत उच्च न्यायालयाने दिलेल्या आदेशाचे पालन करत भाविकांनी केवळ सहा फुटांच्या जास्त उंच असलेल्या मूर्त्याच खाडी घाटावर विसर्जनासाठी आणाव्यात, असे आवाहन प्रशासनाकडून करण्यात आले आहे.

ठाण्यातील कोलशेत, पारसिक घाटावर मुंबईतील मोठ्या मूर्त्या विसर्जनासाठी आणल्या जातात. त्यामुळे या मार्गावर वाहतुकीचे नियोजन चोखपणे केले जाते. आयुक्तालयातील सर्व विसर्जन घाट आणि त्याकडे जाणाऱ्या मार्गावर पुरेसे मनुष्य बळ पुरवण्यात आले आहे.
पंकज शिरसाट, उपायुक्त, वाहतूक विभाग