नवी मुंबईत सार्वजनिक मंडळांमध्ये भक्तांची गर्दी

नवी मुंबईत सार्वजनिक मंडळांमध्ये भक्तांची गर्दी
गौरी-गणेश विसर्जनानंतर विविध देखावे पाहण्यासाठी ओढा
तुर्भे, ता. ४ (बातमीदार) : नवी मुंबईतील सार्वजनिक गणेशोत्सव मंडळात दीड ते पाच दिवसांच्या गौरी-गणेश विसर्जनानंतर भक्तांची प्रचंड गर्दी पाहायला मिळाली. आबालवृद्ध, विद्यार्थी आणि कुटुंबासह शहरातील नागरिक मंडळात आलेल्या सामाजिक संदेश देणाऱ्या प्रबोधनात्मक देखावे, चलचित्र, पर्यावरणपूरक प्रकल्प, काल्पनिक महाल, उंच मूर्ती व रंगीबेरंगी रोषणाई पाहण्यासाठी उत्सुक होते.
यंदा सार्वजनिक मंडळांनी गाजलेल्या सामाजिक व पर्यावरणीय विषयांवर देखावे सादर केले. ‘महादेवाच्या रूपातील गणेशमूर्ती’, छत्रपती शिवाजी महाराज यांच्या महतीसंबंधी देखावे, गजमहल, माता वैष्णवदेवी मंदिर तसेच चंद्रयान प्रकल्पाची हुबेहूब प्रतिकृती या देखाव्यांमुळे भक्तांचे लक्ष वेधले गेले. काही मंडळांनी ध्वनिफिती आणि विविध सामाजिक उपक्रमाद्वारे विद्यार्थ्यांसह नागरिकांना माहिती दिली. मंडळाचे कार्यकर्ते आणि पोलिस प्रशासन यांनी गर्दीचे व्यवस्थापन करण्यासाठी विशेष तयारी केली होती. त्यामुळे विसर्जनाच्या शेवटच्या दिवशी हा गणरायाचा ‘दर्शनवार’ ठरला आहे. रविवारपासून भक्तांनी शहरातील विविध सार्वजनिक मंडळांना भेट देण्यास सुरुवात केली होती, आणि अनंत चतुर्थीच्या विसर्जनाला फक्त एक दिवस शिल्लक असल्याने सायंकाळी सहा नंतर भक्तांची गर्दी वाढू लागली. वाशी, नेरूळ, कोपरखैरणे तसेच सीबीडी, ऐरोली परिसरातील शाळा व महाविद्यालयातील विद्यार्थी वर्ग मंडळातील प्रबोधनात्मक व पर्यावरणपूरक देखावे पाहण्यासाठी नागरिकांची गर्दी होत आहे. यंदाच्या उत्सवाने नवी मुंबईतील सार्वजनिक गणेशोत्सव मंडळांचे महत्त्व व गुणवत्ता पुन्हा अधोरेखित केली आहे. भक्तांच्या गर्दीमुळे आणि विविध कार्यक्रमांच्या यशस्वी आयोजनामुळे शहरातील सांस्कृतिक व पर्यावरणीय संदेश रसिकांपर्यंत पोहचला आहे.