कर्जाच्या माध्यमातून महिलेची ९३ लाखाची फसवणूक

कर्जाच्या माध्यमातून महिलेची ९३ लाखांची फसवणूक
सकाळ वृत्तसेवा
डोंबिवली, ता. ४ : आपणास व्यवसायासाठी पैशांची अत्यंत गरज आहे. मी तुमच्या नावावर कर्ज काढतो, त्या कर्जाचे हप्ते मी नियमित वेळेत भरतो. असे नवी मुंबईतील ऐरोली येथील एका व्यक्तीने डोंबिवलीत राहणाऱ्या नोकरदार महिलेला सांगितले. कर्जासाठी त्यांची कागदपत्रे घेऊन वित्तीय संस्थेकडून ९२ लाख ६० हजारांचे कर्ज काढले. त्यानंतर या कर्जातील काही रक्कम फेडून उर्वरित रक्कम फेडण्यास नकार देत महिलेची फसवणूक केल्याचा प्रकार उघडकीस आला आहे. याप्रकरणी विष्णुनगर पोलिस ठाण्यात तक्रार दाखल केली आहे.
८ एप्रिल २०२२ ते १६ एप्रिल २०२२ या कालावधीत हा फसवणुकीचा प्रकार घडला आहे. योगेश नाईक असे फसवणूक करणाऱ्या व्यक्तीचे नाव आहे. तो नवी मुंबईतील ऐरोली येथील सेक्टर-१ मध्ये राहतो, असे पोलिस ठाण्यातील तक्रारीत तक्रारदार महिलेने म्हटले आहे. तक्रारदार महिला ही पश्चिमेला महात्मा गांधी रोड परिसरात राहते. योगेश याने सदर महिलेला मी सरकारी नोकर आहे, त्यामुळे मला कर्ज मिळत नाही. पैशांची गरज असल्याने आपल्या कागदपत्रांचा वापर करून त्याने महिलेच्या कागदपत्रांच्या आधारे वित्तीय संस्थेतून कर्ज काढले. ९२ लाख ६० हजार १४९ रुपयांचे कर्ज मंजूर झाले. कर्जाची रक्कम महिलेच्या खात्यावर जमा झाल्यानंतर ती विश्वास संपादन करत त्याने स्वतःच्या खात्यावर वळवून घेतली. सुरुवातीला महिलेला दाखवण्यासाठी त्याने कर्ज हप्ताचे १२ लाख १६ हजार ८९९ रुपयांची रक्कम भरणा केली. त्यानंतर त्यानंतर त्याने कर्जाचे हप्त फेडप्यास टाळाटाळ सुरू केली. कर्जाचे हप्ते चुकू लागल्याने वित्तीय संस्थेकडून महिलेला विचारणा होऊ लागली; मात्र ती व्यक्ती हप्ते फेडण्यास टाळाटाळ करू लागली. त्याने ८१ लाख ४३ हजार ४५० रुपयांच्या रक्कम हप्त्यासह कर्ज फेडण्यास नकार देत तो पसार झाला. कर्जाऊ रकमेचा अपहार करून आपली फसवणूक केली म्हणून महिलेने विष्णुनगर पोलिस ठाण्यात तक्रार दाखल केली.