जितेंद्रे आव्हाड यांचे समर्थक भाजपात

जितेंद्रे आव्हाड यांचे समर्थक भाजपत

अमित सरय्या यांच्या हाती कमळ

सकाळ वृत्तसेवा
ठाणे, ता. ४ : राष्ट्रवादी शरद पवार गटाचे आमदार डॉ. जितेंद्र आव्हाड यांचे कट्टर समर्थक मानले जाणारे माजी नगरसेवक मिलिंद पाटील यांच्यासह पाच ते सहा नगरसेवकांनी काही महिन्यांपूर्वी शिवसेना शिंदे गटात प्रवेश करून आव्हाडांना धक्का दिला होता. त्यातच आता सावरकरनगर येथील माजी नगरसेवक व आव्हाडांचे समर्थक अमित सरय्या यांनी भाजपचे कमळ हाती घेतले आहे. त्यामुळे हा आमदार जितेंद्र आव्हाड यांना दुसरा धक्का असल्याचे बोलले जात आहे.

ठाणे महापालिका निवडणूक येत्या काही महिन्यांवर येऊन ठेपली आहे. त्यामुळे राजकीय घडामोडींना वेग येत असल्याचे दिसून येत आहे. राष्ट्रवादी काँग्रेस (शरद पवार गट) पक्षाचे माजी नगरसेवक आणि जितेंद्र आव्हाड यांचे कट्टर समर्थक अमित सरय्या यांनी भाजपमध्ये प्रवेश केला आहे. मुंबईत भाजप प्रदेशाध्यक्ष रवींद्र चव्हाण यांच्या उपस्थितीत गुरुवारी (ता. ४) दुपारी झालेल्या पक्षप्रवेश कार्यक्रमात सरय्या यांच्यासोबत अनेक स्थानिक कार्यकर्त्यांनी भाजपमध्ये प्रवेश केला. अमित सरय्या यांनी २०१२ साली सावरकरनगर प्रभागातून निवडणूक लढवत शिवसेनेचे तत्कालीन नगरसेवक दिलीप बारटक्के यांचा पराभव केला होता. त्यानंतर त्यांनी त्या भागात स्वतःचा प्रभाव निर्माण केला होता. मात्र २०१७च्या महापालिका निवडणुकीत बारटक्के यांनी पुनरागमन करीत सरय्या यांचा पराभव केला. तरीही सरय्या हे या भागातील सक्रिय आणि प्रभावी राजकीय नेते म्हणून ओळखले जातात. सरय्या यांना पक्षात घेऊन उपमुख्यमंत्री एकनाथ शिंदे यांच्या मतदारसंघात भाजप नवी खेळी खेळली असून, या पक्षप्रवेशामुळे वागळे इस्टेट परिसरातील राजकीय समीकरणे बदलण्याची शक्यतादेखील वर्तविण्यात येत आहे.

शिंदे गटाला शह?
वागळे इस्टेट हा परिसर उपमुख्यमंत्री एकनाथ शिंदे यांचा बालेकिल्ला आहे. याच भागातील सावरकरनगरमधून यापूर्वी अमित सरय्या निवडून आले होते. या भागातील सक्रिय आणि प्रभावी नेते म्हणून सरय्या यांच्याकडे पहिले जात आहे. अशातच ठाणे महापालिका निवडणुकीच्या तोंडावर सरय्या यांच्या प्रवेशामुळे वागळेत भाजपची ताकद वाढण्याची शक्यता आहे. या पक्षप्रवेशासंदर्भात त्यांना विचारले असता, कार्यकर्त्यांचा आग्रह आणि प्रभागाच्या विकासासाठी भाजपमध्ये जाण्याचा निर्णय घेतला असल्याची प्रतिक्रिया सरय्या यांनी दिली.
-------