मुंबई-अहमदाबाद महामार्गावर भीषण अपघात

मुंबई-अहमदाबाद महामार्गावर भीषण अपघात
एक ठार, चौघे जखमी

कासा, ता. ४ (बातमीदार) : मुंबई-अहमदाबाद महामार्गावर शिस्ने-आंबोली येथील पटेल हॉटेलसमोर गुरुवारी (ता. ४) सकाळी सहा वाजण्याच्या सुमारास भीषण अपघाताची घटना घडली. यामध्ये गुजरातमधील ६० वर्षीय महिलेचा जागीच मृत्यू झाला तर इतर चार जण जखमी झाले.

गुजरातहून मुंबईकडे जाणाऱ्या कारला एका भरधाव वाहनाने मागून जोरदार धडक दिल्याने हा अपघात झाला. या धडकेत कारमधील निलिबेन सोलंकी, (वय अंदाजे ६०, राहणार भावनगर) यांचा मृत्यू झाला. तर कारमधील प्रकाश सोलंकी (६५), हरीन सोलंकी (४०), जितल सोलंकी (३५) आणि चालक अतुलभाई पटेल (४०) हे सर्व भावनगरचे रहिवासी किरकोळ जखमी झाले. जखमींना तलासरी येथील ग्रामीण रुग्णालयात दाखल करण्यात आले. या अपघाताची माहिती मिळताच महामार्ग पोलिस केंद्र चारोटी येथील पोलिसांनी घटनास्थळी धाव घेतली. यामध्ये अपघातग्रस्त कार क्रेनद्वारे महामार्गाच्या बाजूला करून वाहतूक सुरळीत करण्यात आली. याप्रकरणी कासा पोलिसांनी अज्ञात वाहनचालकाविरुद्ध गुन्हा दाखल करण्याची प्रक्रिया सुरू केली आहे.