रुग्णवाहिकेत सफाळेच्या गरोदर महिलेची प्रसूती

रुग्णवाहिकेतच महिलेची प्रसूती

पालघर, ता. ४ : प्रसूतीसाठी समस्या निर्माण होतील, असे सांगून ग्रामीण रुग्णालयात पाठविण्यात आलेल्या महिलेची रुग्णवाहिकेतच प्रसूती झाल्याचा प्रकार समोर आला आहे. विधी सांबरे (वय २५) असे या महिलेचे मातेचे नाव असून, या प्रकारामुळे आरोग्यव्यवस्थेवर प्रश्‍नचिन्ह उभे केले जात आहे.

विधी यांना सोमवारी पहाटेच्या सुमारास (ता. १) प्राथमिक आरोग्य केंद्रात आवश्यक व तांत्रिक तपासणी न करता थेट गुंतागुंतीचे कारण पुढे करून या उपचारार्थ पुढे पाठवण्यात आले. वास्तविक पाहता केंद्रात नजीकचे किंवा परिसरातील स्त्रीरोगतज्ज्ञ बोलावून त्यांच्यामार्फत प्रसूतीचे प्रयत्न शक्य होते; मात्र तसे न करता सफाळे आरोग्य केंद्रातून रुग्णवाहिका करून विधी यांना पालघर ग्रामीण रुग्णालयात हलवायला भाग पाडण्यात आले. ऐन प्रसूतीच्या वेळेत हा निर्णय महिलेच्या जीवावर बेतणारा होता. दरम्यान, सोमवारी पहाटे तीन वाजण्याच्या सुमारास रुग्णवाहिकेतून पालघरकडे जाताना विधी यांना खूप प्रसवकळा जाणवल्याने रुग्णवाहिकेत असणाऱ्या वैद्यकीय अधिकारी डॉ. रुक्साना शेख यांनी रुग्णवाहिकेतच विधी यांची सुखरूप प्रसूती केली. त्यानंतर त्यांना पालघर ग्रामीण रुग्णालयात दाखल करण्यात आले.

सफाळे आरोग्य केंद्राची चालढकल
..
सफाळे आरोग्य केंद्रात प्रसूतीदरम्यान गुंतागुंत असल्याचे सांगण्यात आले. रस्त्यात प्रवासादरम्यान महिलेची प्रसूती झाली. माता व बाळ दोघेही सुखरूप आहेत. जर प्रसूती सरळ झाली तर नेहमीप्रमाणे गुंतागुंतीचे शब्द वापरून स्वतःची जबाबदारी आरोग्य व्यवस्था झटकते का, असा प्रश्न येथील स्थानिकांनी केला आहे.