पोलिसाचा हृदयविकाराच्या झटक्याने मृत्यू

पोलिसाचा हृदयविकाराच्या झटक्याने मृत्यू
महिनाभरातील दुसरी घटना; कर्मचाऱ्यांच्या आरोग्याबाबत प्रश्नचिन्ह

बदलापूर, ता. ४ (बातमीदार) : बदलापूर पश्चिमेकडील पोलिस ठाण्यात कर्तव्य बजावत असताना, सहाय्यक पोलिस निरीक्षक विजय रोकडे यांचा १० ऑगस्ट रोजी हृदयविकाराच्या झटक्याने मृत्यू झाला. या घटनेला महिना उलटत नाही तोच, याच पोलिस ठाण्यात पोलिस नाईक म्हणून सेवा बजावणाऱ्या योगेश देवराम अहिरे हे बुधवारी (ता. ३) आपली रात्रपाळीची सेवा बजावून घरी गेले असता, हृदयविकाराच्या तीव्र झटक्याने त्यांचे निधन झाल्याची घटना घडली आहे. या दोन्ही घटनांमुळे पोलिसांच्या आरोग्याबाबत प्रश्नचिन्ह उपस्थित केले जात आहे.
बदलापूर पश्चिम रमेशवाडी परिसरात राहणारे पोलिस नाईक म्हणून सेवा बजावणारे, योगेश देवराम अहिरे हे बुधवारी सकाळी आपली रात्रपाळीची सेवा बजावून घरी गेले. या वेळी दुपारच्या जेवणाची तयारी सुरू असताना, ते मोबाईलवर काहीतरी बघत बसले होते; अशातच ते अचानक बसल्याच जागी खाली कोसळले आणि मोबाईल त्यांच्या छातीवर पडला. या वेळी त्यांच्या पत्नीने धाव घेत अहिरे यांना सांभाळण्याचा प्रयत्न केला; मात्र त्याची हालचाल होत नसल्याचे लक्षात येताच, लगेचच त्यांनी जवळच्या एका खासगी रुग्णालयात अहिरे यांना नेले. या वेळी रुग्णालयातील डॉक्टरांनी त्यांना मृत घोषित केले. अहिरे यांच्या पश्चात पत्नी, मुलगा व मुलगी असा परिवार आहे. मोहनानंद नगर येथील वैकुंठधाम स्मशानभूमीत गुरुवारी (ता. ४) रोजी सकाळी साडेअकराच्या सुमारास अहिरे यांच्यावर शासकीय इतमामात अंत्यसंस्कार करण्यात आले. त्यांच्या निधनामुळे बदलापूर पश्चिम पोलिस ठाण्यात शोककळा पसरली आहे.

कर्मचाऱ्यांच्या आरोग्यावर परिणाम
महिनाभरातच एकाच पोलिस स्थानकातील दोन पोलिस कर्मचाऱ्यांच्या हृदयविकाराच्या झटक्याने मृत्यू झाल्याने, कामाचा वाढता ताण, बदललेली जीवनशैली आणि मानसिक त्रास याचा कुठेतरी या पोलिस कर्मचाऱ्यांच्या आरोग्यावर परिणाम होत असून, ही गंभीर बाब मानली जात आहे. या घटनेमुळे पोलिसांच्या आरोग्याबाबत अनेक प्रश्न उपस्थित केले जात आहेत.