रेल्वे प्रवाशांची लूट करणारी टोळी गजाआड

रेल्वे प्रवाशांची लूट करणारी टोळी गजाआड
२२ लाखांचा मुद्देमाल जप्त; १६ गुन्ह्यांचा पर्दाफाश
सकाळ वृत्तसेवा
मुंबई, ता. ४ : मेल-एक्स्प्रेस गाड्यांमध्ये प्रवाशांच्या बॅगा व पर्स चोरी करणाऱ्या सराईत टोळीचा लोहमार्ग पोलिसांनी पर्दाफाश केला. या कारवाईत दोन आरोपींना गजाआड करण्यात आले असून, त्यांच्याकडून ३१५ ग्रॅम सोने आणि ७२ हजार रोख रकमेसह २२ लाख २४ हजार ७६९ रुपये किमतीचा मुद्देमाल जप्त करण्यात आला.
लोहमार्ग पोलिसांनी दिलेल्या माहितीनुसार, २३ ते २४ मेदरम्यान कोईम्बतूर-राजकोट एक्स्प्रेसमध्ये प्रवाशाचा पॅन्टचा खिसा कापून तीन लाख ६० हजारांचा मुद्देमाल लंपास करण्यात आला होता. याप्रकरणी कल्याण रेल्वे पोलिस ठाण्यात गुन्हा दाखल झाला. त्यानुसार पोलिसांनी २५ ऑगस्टला कल्याण स्थानक परिसरातून वकार आलम तौकिर खान (वय ३९, रा. गाझीपूर, उत्तर प्रदेश) आणि जुगलकिशोर ओमप्रकाश विश्वकर्मा (वय ४१, रा. कानपूर, उत्तर प्रदेश) या दोघांना ताब्यात घेतले. चौकशीत त्यांनी आणखी चार साथीदारांसह केलेल्या १६ चोरींच्या गुन्ह्यांची कबुली दिली. वरिष्ठ पोलिस निरीक्षक विजय खेडकर आणि निरीक्षक रोहित सावंत यांच्या नेतृत्वात सहाय्यक पोलिस निरीक्षक दीपक पाटील आणि गुन्हे शाखेच्या पथकाने ही कारवाई केली.