मराठा आरक्षणावरून ‘ओबीसीं’मध्ये खदखद

पालघर, ता. ४ (सप्टेंबर) : ओबीसी समाजाच्या कोट्यातून मराठा समाजाला आरक्षण देण्याच्या पार्श्वभूमीवर पालघरमध्ये ओबीसी हक्क संघर्ष समितीने खदखद व्यक्त केली आहे. अन्य समाजाला आरक्षण देताना ओबीसी समाजावर कोणताही अन्याय होऊ नये, अशी मागणी समितीकडून करण्यात आली. यासंदर्भात ओबीसी हक्क संघर्ष समितीने राज्याचे वनमंत्री तथा पालघर जिल्ह्याचे पालकमंत्री गणेश नाईक, जिल्हाधिकारी डॉ. इंदुराणी जाखड यांची भेट घेऊन निवेदन सादर केले.

सरकारच्या वतीने मराठा समाजाकरिता काढण्यात आलेल्या शासन निर्णयाच्या अनुषंगाने ओबीसी समाजावर कुठलाही अन्याय होऊ नये, ओबीसी समाजाच्या असलेल्या आरक्षणावर कुठलीही गदा येऊ नये, अशी मागणी सरकार दरबारी निवेदनातून दिली गेली. ओबीसी हक्क संघर्ष समितीचे अध्यक्ष राजीव पाटील, समितीचे निमंत्रक कुंदन संखे, उपाध्यक्ष भालचंद्र ठाकरे, निवृत्ती सनदी अधिकारी आर. डी. संखे, पी. टी. पाटील, अरविंद वर्तक, जितेंद्र राऊळ, अजय ठाकूर यासह ओबीसी हक्क संघर्ष समितीचे पदाधिकारी, ओबीसी बांधव उपस्थित होते.