कर्जत यार्डमध्ये उद्या वाहतूक व पॉवर ब्लॉक

कर्जत यार्डमध्ये उद्या वाहतूक व पॉवर ब्लॉक
खोपोली मार्गावरील काही लोकल रद्द

सकाळ वृत्तसेवा
मुंबई, ता. ४ : कर्जत यार्डमध्ये ओव्हरहेड वायर (ओएचई) व अभियांत्रिकी कामे करण्यासाठी मध्य रेल्वेने शनिवारी (ता. ६) वाहतूक आणि पॉवर ब्लॉक घेण्याचे नियोजन केले आहे. या कामांमुळे कर्जत ते खोपोली या मार्गावरील काही लोकल सेवांवर परिणाम होणार असून, प्रवाशांची यामुळे तात्पुरती गैरसोय होणार आहे.
कर्जत यार्डमधील तांत्रिक कामांसाठी शनिवार दुपारी २.३० ते ४.३० या वेळेत दोन तासांचा ब्लॉक घेण्यात येईल. या काळात कर्जतहून दुपारी ३.३९ वाजता सुटणारी खोपोली लोकल तसेच खोपोलीहून दुपारी २.५५ वाजता सुटणारी कर्जत लोकल रद्द राहील. त्यामुळे या वेळेत प्रवास करणाऱ्या प्रवाशांनी पर्यायी गाड्यांचा विचार करावा, असे आवाहन रेल्वेकडून करण्यात आले आहे. तसेच रविवार ७, सोमवार ८ आणि मंगळवार ९ सप्टेंबर रोजी दुपारी २.३० ते ५.०० या वेळेत अडीच तासांचा ब्लॉक घेण्यात येईल. या काळात सीएसएमटीहून दुपारी १२.२० वाजता सुटणारी खोपोली लोकल केवळ कर्जतपर्यंतच धावेल आणि कर्जत ते खोपोलीदरम्यान ही सेवा रद्द राहील. त्याचप्रमाणे खोपोलीहून संध्याकाळी ४.३० वाजता सुटणारी सीएसएमटी लोकल कर्जतपासून सुरू होईल. ही गाडी कर्जत स्थानकावरून संध्याकाळी ४.५७ वाजता सुटेल. खोपोली ते कर्जतदरम्यान ही लोकल रद्द करण्यात आली आहे. रेल्वेने प्रवाशांना सूचना केली असून, या कालावधीत आपल्या प्रवासाचे नियोजन करताना बदल लक्षात घ्यावेत, असे सांगितले आहे.