राज्यात वैद्यकीय प्रवेशाच्या ३५० नवीन जागांना मान्यता

राज्यात वैद्यकीयच्या ३५० नव्या जागा
देशात २,७२० जागा; अभिमत विद्यापीठांना सर्वाधिक संधी
मुंबई, ता. ४ ः राष्ट्रीय आयुर्विज्ञान आयोगाने (एनएमसी) देशभरातील विविध अभिमत विद्यापीठे आणि वैद्यकीय महाविद्यालयांमध्ये वैद्यकीय प्रवेशाच्या २,७२० नव्या जागांना मान्यता दिली. त्यापैकी १,१०० जागा सरकारी वैद्यकीय महाविद्यालयांतील आहेत. महाराष्ट्राला ३५० नव्या जागांची मान्यता मिळाली असून त्यातील ३०० जागा अभिमत विद्यापीठांना, तर ५० जागा अंधेरीतील एम्प्लॉईज स्टेट इन्शुरन्स कॉर्पोरेशन (ईएसआयसी) वैद्यकीय महाविद्यालयाला मिळाल्या आहेत.
एनएमसीने दिलेल्या नवीन जागांवरील प्रवेश हे अखिल भारतीय कोट्याद्वारे उपलब्ध होणार आहे. यासाठी प्रवेशाची दुसरी फेरी ५ सप्टेंबरपासून सुरू होणार असून यात अनेक विद्यार्थ्यांना नव्याने प्रवेशाची संधी मिळणार आहे.
राज्यातील अभिमत विद्यापीठातील वैद्यकीय शिक्षणाचे शुल्क हे खूप महागडे आहे. अनेक महाविद्यालये आपल्या मर्जीनुसार शुल्क आकारतात. या पार्श्वभूमीवर सरकारी, अनुदानित वैद्यकीय, इतर खासगी महाविद्यालयांमध्ये अधिकच्या जागा मिळणे आवश्यक होते, असे पालकांचे म्हणणे आहे.
---
ईएसआयसी कार्डधारकांना फायदा
दरम्यान, राज्यात ५० जागा ईएसआयसी वैद्यकीय महाविद्यालयाला मिळाल्या आहे. त्यात ईएसआयसीच्या केवळ आठ जागा एआयक्यूसाठी असतील आणि उर्वरित जागा ज्या विद्यार्थ्यांच्या पालकांकडे ईएसआयसी कार्ड आहे, त्यांच्यासाठी उपलब्ध होणार आहेत.