रिक्षाचालकाकडून तरुणाला बेदम मारहाण

उल्हासनगर, ता. ७ (वार्ताहर) : उल्हासनगर कॅम्प २ येथील खेमानी चौकातून कल्याणच्या दिशेने जाणाऱ्या एका परप्रांतीय तरुणावर रिक्षाचालक आणि त्याच्या साथीदारांनी हल्ला करून लूटमार केल्याची धक्कादायक घटना मध्यरात्री घडली.
संतोष कुमार असे जखमी तरुणाचे नाव असून तो शिलाई कामगार आहे. मध्यरात्री एकच्या दरम्यान संतोष हा गावी जाण्यासाठी रिक्षात बसला होता; मात्र रिक्षाचालकाने पंजाबी कॉलनीतील एका गल्लीत गाडी थांबवत संतोषला बेदम मारहाण केली. या हल्ल्यात तो गंभीर जखमी होऊन रक्तबंबाळ झाला. आरोपींनी संतोषचा मोबाईल आणि रोख रक्कम हिसकावून पलायन केले. चालकासोबत एक पुरुष आणि महिला सहभागी होते. याप्रकरणी उल्हासनगर पोलिस ठाण्यात गुन्हा दाखल करण्याची प्रक्रिया सुरू आहे. पोलिसांकडून तपास सुरू आहे. दरम्यान, संतोष कुमार यांनी आरोपींना तत्काळ अटक करून कठोर कारवाई करण्यात यावी, अशी मागणी केली आहे.