गणेशाला निरोप देताना ५ तरुण नदीत बुडाले

विसर्जनावेळी पाच जण बुडाले
शहापूरमध्ये तिघांचा मृत्यू; दोघांना वाचविण्यात यश
शहापूर, ता. ७ (वार्ताहर) : भारंगी नदीकाठी विसर्जनाआधी गणपती आरती सुरू असताना नदीवरच बांधलेल्या बंधाऱ्यात पोहण्यासाठी उडी मारलेल्या तरुणाला वाचविण्यासाठी पाण्यात उतरलेले पाच जण बुडाल्याची घटना आसनगावजवळ घडली. मुंढेवाडीतील शिवतेज मित्रमंडळाच्या गणपती विसर्जनाची तयारी सुरू असताना शनिवारी (ता. ६) सायंकाळी सहा वाजण्याच्या सुमारास ही घटना घडली. या घटनेतील दोघांना वाचविण्यात तत्काळ यश आले, तर उर्वरित तिघांपैकी एकाचा मृतदेह शनिवारी रात्री उशिरा तर एकाचा मृतदेह रविवारी (ता. ७) दुपारी हाती लागला. तसेच एकाचा शोध सुरू आहे.

रामनाथ घारे (वय २७), भगवान वाघ (वय २९), प्रतीक मुंढे (वय २३), दत्ता लोटे (वय ३०) आणि कुलदीप जाखेरे (वय ३२) अशी नदीत बुडालेल्यांची नावे आहेत. त्यापैकी रामनाथ घारे व भगवान वाघ या दोघांना वाचविण्यात यश आले असून, त्यांच्यावर उपजिल्हा रुग्णालयात उपचार सुरू आहेत. प्रतीक मुंढे व दत्ता लोटे या दोघांचा मृत्यू झाला आहे. जीवरक्षक दल व पोलिस प्रशासनाने शोधमोहीम राबलल्यानंतर प्रतीक मुंढे याचा मृतदेह शनिवारी रात्री आढळून आला. दत्ता लोटे याचा मृतदेह रविवारी (ता. ७) दुपारी हाती लागला. कुलदीप जाखेरे याचा शोध सुरू असून स्थानिक नागरिक, जीवरक्षक दलाचे पदाधिकारी, शहापूर पोलिस आणि एनडीआरएफच्या पथकाकडून शोधमोहीम सुरू आहे.

भारंगी नदीकाठी शिवतेज मित्रमंडळाच्या गणपती विसर्जनाआधी आरती सुरू होती. त्या वेळी दत्ता लोटे हा युवक पोहण्यासाठी नजीकच्या बंधाऱ्यावरून वाहणाऱ्या भारंगी नदीत गेला. या वेळी पाण्याचा अंदाज न आल्याने दत्ता पाण्यात बुडू लागला. त्याला वाचवण्यासाठी प्रतीक मुंडे, रामनाथ घारे, भगवान वाघ व कुलदीप जाखेरे यांनीही पाण्यात उड्या मारल्या. या वेळी प्रसंगावधान राखत मित्रांच्या मदतीने योगेश्वर नाडेकर याने पाण्यात उडी घेऊन रामनाथ व भगवान या दोघांना मोठ्या शिताफीने पाण्यातून बाहेर काढले. परंतु प्रतीक मुंढे, दत्ता लोटे व कुलदीप जाखेरे हे तिघे वाहून गेले.