पालिका रुग्णालयात नवजात बालकाचा मृत्यू

पालिका रुग्णालयात नवजात बालकाचा मृत्यू

डॉक्टरच्या निष्काळजीमुळे मृत्यू झाल्याचा नातेवाइकांचा आरोप

कल्याण, ता. ७ (वार्ताहर) : कल्याण-डोंबिवली महापालिकेच्या वसंत व्हॅली प्रसूतिगृहात नवजात बालिकेचा मृत्यू झाल्याची घटना रविवारी (ता. ७) सकाळी घडली. बाळाचा मृत्यू डॉक्टर आणि कर्मचाऱ्यांच्या निष्काळजीमुळे झाल्याचा आरोप बालकाच्या नातेवाइकांकडून करण्यात आला आहे.
कल्याण पूर्वेतील पिसवली परिसरात राहणाऱ्या अजरूद्दीन सोबराती मनसुरी यांची पत्नी तसलीमा मनसुरी यांना प्रसूतीसाठी शनिवारी (ता. ६) पहाटे ४ वाजण्याच्या सुमारास पालिकेच्या वसंत व्हॅली प्रसूतिगृहात दाखल करण्यात आले. त्यानंतर सकाळी ९च्या सुमारास त्यांची प्रसूती झाली. या वेळी बाळाची प्रकृती बिघडल्याने डॉक्टरांनी बाळाला ऑक्सिजनवर ठेवण्याचा सल्ला देत त्या बाळाला ऑक्सिजनवर ठेवण्यात आले, पण दुसऱ्या दिवशी रविवारी सकाळी बाळाचा मृत्यू झाला. या वेळी संतप्त झालेल्या नातेवाइकांनी रुग्णालयात गोंधळ घातला व बाळाचा मृत्यू येथील डॉक्टर आणि कर्मचाऱ्यांच्या हलगर्जीमुळे झाल्याचा आरोप केला आहे. याप्रकरणी अजरुद्दीन मनसुरी यांनी खडकपाडा पोलिसांत तक्रार दिली आहे. दुसरीकडे बाळाच्या मृत्यूचा अहवाल आल्यानंतर कारवाई करण्यात येईल, अशी माहिती आरोग्य विभागाचे उपायुक्त प्रसाद बोरकर यांनी दिली, तर शिवसेनेचे अमित कोळेकर यांनी दोषींवर कारवाईची मागणी केली. पालिकेच्या मुख्य वैद्यकीय अधिकारी डॉ. दिपा शुक्ला यांनी सांगितले की, ‘वैद्यकीय अहवालानंतर बाळाच्या मृत्यूचे नेमके कारण समजेल त्यानंतर योग्य ती कारवाई करण्यात येईल.’