आईने ३ वर्षांच्या मुलीला गळफास देऊन स्वतःही केली आत्महत्या !

आईने तीन वर्षांच्या मुलीला गळफास देऊन स्वतःही केली आत्महत्या

​अंबरनाथ, ता. ७ (वार्ताहर) : श्रीकृष्णनगर परिसरात एका तीन वर्षांच्या चिमुरडीला तिच्या आईने गळफास देऊन तिची हत्या केली. त्यानंतर त्याच साडीने स्वतः गळफास घेऊन आत्महत्या केल्याची धक्कादायक घटना समोर आली आहे.
शिवाजीनगर पोलिस ठाण्यात दाखल झालेल्या फिर्यादीनुसार, दीपक अच्छेलाल निशाद (वय २७) आणि त्याची पत्नी राजकुमारी (वय २६) हे श्रीकृष्णनगरमधील देवकर चाळीत राहत होते. दीपक एका खासगी कंपनीत नोकरी करतो. तो शुक्रवारी (ता. ५) रात्री साडेनऊ वाजता नेहमीप्रमाणे कामावर गेला होता आणि दुसऱ्या दिवशी सकाळी साडेनऊ वाजता घरी परत आला. या वेळी पत्नी राजकुमारी आणि मुलगी अनुष्का (वय ३) हे घरात मृतावस्थेत आढळून आल्या. राजकुमारीने आपल्या मुलीला साडीने गळफास देऊन तिची हत्या केली आणि नंतर त्याच साडीने स्वतः आत्महत्या केली, असे प्राथमिक तपासात दिसून आले आहे. मिळालेल्या माहितीनुसार, राजकुमारीची बहीण धनवंती हिचा आठ वर्षांचा मुलगा मुकेश याचे नुकतेच आजारपणामुळे निधन झाले होते. या घटनेमुळे राजकुमारी मानसिक तणावाखाली होती. याच तणावातून तिने हे टोकाचे पाऊल उचलले असावे, असा अंदाज पोलिसांनी व्यक्त केला आहे. या घटनेची नोंद शिवाजीनगर पोलिस ठाण्यात करण्यात आली असून, पुढील तपास सुरू आहे.