जेएयुमध्ये निधी मिळूनही मराठी भाषा अध्यासन का अडले?

जेएनयूमध्ये मराठी भाषा अध्यासन का अडले?
ज्येष्ठ साहित्यिक डॉ. श्रीपाद भालचंद्र जोशी यांचा सवाल
मुंबई, ता. ७ ः दिल्लीतील जवाहरलाल नेहरू विद्यापीठातील नियोजित  मराठी  भाषा  अध्यासनासाठी राज्य सरकारने निधीही दिला आहे; मात्र आतापर्यंत ते अध्यासन का सुरू होऊ शकले नाही, असा सवाल ज्येष्ठ साहित्यिक डॉ. श्रीपाद भालचंद्र जोशी यांनी केला आहे. यासाठी त्यांनी मुख्यमंत्र्यांसह मराठी भाषा विकासमंत्र्यांना पत्र लिहून यासाठीची विचारणा केली आहे. तसेच मराठी भाषा विकासाच्या नावाने सरकारकडून आयोजित केल्या जात असलेल्या विश्व मराठी संमेलनात मागील दोन वर्षांत २० कोटींहून अधिक रुपयांचा निरर्थक खर्च का केला जातोय, त्याची काय कारणे असू शकतात, असाही सवाल केला आहे.
जेएनयूमध्ये कवी कुसुमाग्रज मराठी भाषा अध्यासन केंद्र स्थापन करण्यासाठी राज्य सरकाकडून मागील १६ वर्षांपासून प्रयत्न सुरू आहेत. त्यासाठी जेएनयूला निधीही देण्यात आला आहे. त्याच पार्श्वभूमीवर २४ जुलै रोजी मुख्यमंत्री देवेंद्र फडणवीस यांच्या हस्ते जेएनयू येथे ‘श्री छत्रपती शिवाजी महाराज संरक्षण आणि सामरिक विशेष अध्यासन केंद्रा’ची पायाभरणी आणि ‘कुसुमाग्रज मराठी भाषा, साहित्य आणि संस्कृती विशेष केंद्रा’चे उद्‍घाटन करण्यात आले; मात्र त्यानंतर काहीच काम झाले नसल्याने जोशी यांनी आक्षेप नोंदवले आहेत. राज्य सरकारने  मराठी  भाषा  अध्यासन लवकरात लवकर सुरू करण्याची मागणी त्यांनी केली आहे.