भ्रष्ट अधिकाऱ्यांची हकालपट्टी करणार ः गणेश नाईक

भ्रष्ट अधिकाऱ्यांची हकालपट्टी करणार ः गणेश नाईक
सिडकोच्या नव्या इमारतींच्या परवानग्यांवरून विरोध
वाशी, ता. ८ (बातमीदार) ः नवी मुंबई शहरातील नागरी सुविधांसाठी आरक्षित असणारे भूखंड सिडकोने विकले आहेत. या भूखंडांना सीसी देण्याचे काम पालिकेतील भ्रष्ट अधिकाऱ्यांनी केल्याचा गंभीर आरोप वनमंत्री गणेश नाईक यांनी केला आहे. तसेच मुख्यमंत्री देवेंद्र फडणवीस यांची भेट घेऊन हा सारा प्रकार निदर्शनास आणताना भ्रष्ट अधिकाऱ्यांची हकालपट्टी करण्याचा इशाराही त्यांनी दिला आहे.
नवी मुंबई महापालिकेच्या वतीने मोरबे धरण येथे सोमवारी जलपूजन करण्यात आले. या कार्यक्रमाला वनमंत्री गणेश नाईक उपस्थित होते. या वेळी वनमंत्री गणेश नाईक यांनी नवी मुंबईत एमआयडीसी, सिडको आणि महापालिका काम पाहात आहे. पण शहराचे नियोजन करणाऱ्या सिडकोने अनेक भूखंड विकास प्रकल्पांसाठी आरक्षित केले आहेत. या भूखंडांचा शहर विकास आराखड्यांमध्ये समाविष्ट करण्यात आलेला आहे. मात्र सिडकोने शहर विकास आराखड्यातील अनेक भूखंडांची विक्री केल्याने नाईक यांनी संताप व्यक्त केला. सिडकोला दिलेल्या भूखंडाला सीसी देण्याचे काम पालिकेतील भ्रष्ट अधिकाऱ्यांनी केले आहे. शहरातील अनेक भूखंड बिल्डरांच्या घशात घातले आहेत. या वेळी मोरबे धरण परिसरात असणाऱ्या बेकायदा बांधकामांवर कारवाई करावी तसेच त्यांचे पालिकेच्या माध्यमातून पुनर्वसन करावे, अशा सूचना त्यांनी पालिका आयुक्तांना दिल्या.