११७ निरंकारी भक्तांचे उत्स्फूर्त रक्तदान

११७ निरंकारी भक्तांचे उत्स्फूर्त रक्तदान
कल्याण (वार्ताहर) : संत निरंकारी मिशनची सामाजिक शाखा संत निरंकारी चॅरिटेबल फाउंडेशनच्या वतीने रविवारी (ता. ७) संत निरंकारी सत्संग भवन, बदलापूर येथे रक्तदान शिबिराचे आयोजन करण्यात आले होते. या रक्तदान शिबिरात ११७ निरंकारी भक्तांनी मोठ्या उत्साहाने रक्तदान केले. यामध्ये ९७ पुरुष, तर २३ महिला रक्तदात्यांचा समावेश होता.
या शिबिरामध्ये संत निरंकारी रक्तपेढी विलेपार्ले आणि जे. जे. महानगर रक्तपेढीमार्फत रक्त संकलन करण्यात आले. सेवादलाचे क्षेत्रीय संचालक जनार्दन म्हात्रे यांच्या प्रमुख उपस्थितीत नामस्मरण करून शिबिराला सुरुवात करण्यात आली. या वेळी शिबिराला बदलापूरचे माजी नगराध्यक्ष राजेंद्र घोरपडे यांनी भेट दिली. मिशनचे स्थानिक ब्रँच मुखी माधवराव पोंदे यांच्या देखरेखीखाली स्थानिक सेवादल युनिट आणि संत निरंकारी चॅरिटेबल फाउंडेशनचे स्वयंसेवक यांच्या सहयोगाने या शिबिराचे यशस्वीरीत्या आयोजन करण्यात आले.