तारापूरमध्ये वायूगळती

तारापूरमध्ये वायुगळती

तारापुर, ता. ८ (बातमीदार) : तारापूर औद्योगिक क्षेत्रातील रासायनिक कारखान्यामध्ये सोमवारी वायुगळतीची घटना घडली. यामुळे परिसरातील नागरिकांमध्ये काही काळ भीतीचे वातावरण निर्माण झाले, तर काहींना यामुळे त्रास सहन करावा लागला.
औद्योगिक क्षेत्रातील प्लॉट क्रमांक टी-१५० वरील आरती ड्रग्ज लिमिटेड या कारखान्यातून सोमवारी (ता. ८) सायंकाळी सात वाजण्याच्या सुमारास वायुगळती झाली. यामुळे परिसरातील सालवड शिवाजीनगर येथील नागरिकांमध्ये घबराट निर्माण झाली. कारखान्यात उत्पादन प्रक्रिया सुरू असताना हायड्रोक्लोरिक आम्ल बाहेर पडून हवेमध्ये पसरल्यामुळे नागरिकांना डोळे चुरचुरणे आणि घसा खवखवणे यासारखे त्रास सुरू झाले. वायुगळती सुरू झाल्यानंतर कंपनीच्या सुरक्षा अधिकाऱ्यांनी तत्काळ उपाययोजना आखून वायूगळतीवर नियंत्रण मिळवले. मात्र या वायुगळतीमुळे शिवाजीनगर परिसरात भीतीचे पसरल्याने अनेकांनी घरातून बाहेर पळ काढला. या वायुगळतीची माहिती मिळताच तारापूर अग्निशमन दल आणि बोईसर पोलिसांनी घटनास्थळी धाव घेत परिस्थिती नियंत्रणात आणली.

पोलिसांना घेराव
गेल्या वर्षी याच कारखान्यात ब्रोमीन नावाच्या वायूची गळती झाली होती. आरती ड्रग्ज या कारखान्यात वारंवार वायुगळतीच्या घटना घडत असल्यामुळे शिवाजीनगरमधील नागरिकांनी संतप्त होऊन पोलिसांना घेराव घातला व कारखाना बंद करण्याची मागणी केली. काही दिवसांपूर्वीच मेलडी फार्मास्युटिकल्स या कंपनीत वायुभारती होऊन चार कामगारांचा मृत्यू झाला होता, तर दोन कामगार जखमी झाले होते. औद्योगिक क्षेत्रात वारंवार घडणाऱ्या दुर्घटनांमुळे परिसरातील नागरिकांमध्ये भीतीचे वातावरण आहे.