प्रारुप प्रभाग रचनेबाबत हरकती सूचनांवर आजपासून सुनावणी

प्रारूप प्रभागरचनेबाबत हरकती सूचनांवर आजपासून सुनावणी
मुंबई, ता. ९ : मुंबई महानगरपालिका प्रारूप प्रभागरचनेबाबत ४ सप्टेंबरपर्यंत प्राप्त झालेल्या एकूण ४८८ हरकती आणि सूचनांवर उद्यापासून १०, ११ आणि १२ सप्‍टेंबर या तीन दिवसांत राज्य सरकारने नियुक्‍त केलेल्‍या प्राधिकृत अधिकाऱ्यांमार्फत सुनावणी घेतली जाणार आहे. मुंबईतील यशवंतराव चव्हाण सेंटरमध्ये सकाळी ११ ते सायंकाळी साडेपाचदरम्यान सुनावणी होईल.
राज्य सरकारच्‍या नगरविकास विभागाने मुंबई महानगरपालिका सार्वत्रिक निवडणुकीसाठी विविध टप्‍पे निश्चित केले आहेत. याअंतर्गत २२ ऑगस्‍ट २०२५ रोजी प्रारूप प्रभागांच्‍या भौगोलिक सीमा प्रसिद्धीची अधिसूचना जारी करण्‍यात आली. त्‍यावर २२ ऑगस्‍ट ते ४ सप्‍टेंबर या मुदतीत हरकती व सूचना मागविण्‍यात आल्‍या होत्‍या. या कालावधीत एकूण ४८८ हरकती सूचना प्राप्‍त झाल्‍या आहेत. त्यामुळे प्रारूप प्रभागरचनेच्‍या प्रस्‍तावावरील प्राप्‍त हरकती व सूचनांवर सुनावणी घेण्‍यात येणार आहे. या सुनावणीसाठी हरकत घेणाऱ्या व्यक्ती आणि सूचना करणाऱ्या व्यक्तींनी नेमून दिलेल्‍या दिवशी वेळेत उपस्थित राहावे, असे आवाहन प्रशासनाने केले आहे.
...........