पालिकेच्या कंत्राटी वाहनाच्या धडकेत वृद्ध महिला ठार

पालिकेच्या कंत्राटी वाहनाच्या धडकेत वृद्ध महिला ठार

सकाळ वृत्तसेवा
डोंबिवली, ता. ९ : शहराच्या पूर्वेतील छेडा रस्त्यावर एका ७५ वर्षीय महिलेला पालिकेच्या विद्युत विभागाच्या कंत्राटी वाहनाने चिरडल्याची घटना मंगळवारी (ता. ९) सायंकाळी ६ वाजण्याच्या सुमारास घडली. यामध्ये या महिलेचा जागीच मृत्यू झाला. तृप्ती म्हसकर (वय ७५) असे या मृत महिलेचे नाव असल्याची प्राथमिक माहिती आहे. ही घटना सीसीटीव्हीमध्ये कैद झाली आहे.

कल्याण-डोंबिवली महापालिकेचे पथदिवे दुरुस्तीचे काम एस. एस. इलेक्ट्रिक कंपनीला देण्यात आले आहे. या कंपनीची पथदिवे दुरुस्ती करणारी गाडी या रस्त्याने जात असताना समोर चालणाऱ्या तृप्ती म्हसकर यांना या गाडीने धडक दिली. यामध्ये त्या गंभीर जखमी झाल्या. या वेळी स्थानिकांनी चालकाला थांबण्याची सूचना केली. जखमी महिलेला तत्काळ खासगी रुग्णालयात हलविण्यात आले. दरम्यान, महिलेचा मृत्यू झाल्याचे रुग्णालय प्रशासनाने सांगितले. विशेष बाब म्हणजे अपघात होऊन एक तास उलटला तरी रामनगर पोलिसांना याची माहिती नसल्याने नागरिकांकडून आश्चर्य व्यक्त केले जात आहे.