मुंब्र्यातील क्रीडामहोत्सवात ३ हजार स्पर्धकांचा सहभाग!

मुंब्र्यातील क्रीडा महोत्सवात तीन हजार स्पर्धकांचा सहभाग!
कळवा, ता. १३ (बातमीदार) : राष्ट्रवादी काँग्रेस-शरदचंद्र पवार पक्षाचे राष्ट्रीय सरचिटणीस डाॅ. जितेंद्र आव्हाड यांच्या मार्गदर्शनाखाली तसेच माजी विरोधीपक्ष नेते शानू पठाण यांच्या सहकार्याने राष्ट्रवादी विद्यार्थी काँग्रेस-शरदचंद्र पवार पक्षाच्या राष्ट्रीय युवा कार्याध्यक्षा मर्जिया पठाण यांनी मुंब्र्यात भव्य क्रीडा महोत्सवाचे आयोजन केले आहे. शनिवार (ता. १३) आणि रविवार (ता. १४) असे दोन दिवस हा क्रीडा महोत्सव चालणार असून, या मुंब्रा, कौसा परिसरातील सुमारे तीन हजार स्पर्धकांनी या स्पर्धेत सहभाग घेतला आहे.
मुंब्रा कौसा परिसरातील मुलांना क्रीडा गुणांची आवड जोपासता यावी, या उद्देशातून युवा कार्यकर्त्या मर्जिया पठाण यांनी या क्रीडा स्पर्धांचे आयोजन केले आहे. शनिवारी (ता. १३)ला सकाळी कौसा येथील घासवाला कम्पाउंड मैदानात या क्रीडा महोत्सवाचे शानदार उद्घाटन करण्यात आले. धावण्याची शर्यत, गोणी शर्यत, आर्म रेसलिंग या पारंपरिक खेळाबरोबरच कबड्डी, खो-खो, लंगडी अशा विविध क्रीडा प्रकारांचा यामध्ये समावेश करण्यात आला आहे. या स्पर्धेत परिसरातील सुमारे तीन हजार क्रीडापटूंनी सहभाग घेतला आहे. विशेष म्हणजे प्रकाशझोतात झालेल्या कबड्डी आणि खो - खो स्पर्धेच्या वेळी प्रेक्षकांची प्रचंड गर्दी उसळली होती.
दरम्यान, मुंब्रा, कौसा आणि परिसरातील लहान मुले आणि तरुणांमध्ये क्रीडा गुण आहेत, मात्र संधीअभावी या गुणांचे चीज होत नाही. तसेच मैदानी खेळ खेळण्यासाठी प्रोत्साहनही मिळत नसल्याने मुलांचे आयुष्य मोबाईल फोनमध्ये बंदिस्त होत आहे. त्यातून मुलांना बाहेर काढण्यासाठी आपण हा क्रीडा महोत्सव आयोजित केला आहे. दोन दिवस चालणाऱ्या या महोत्सवात विविध भागांतील आणि विविध वयोगटांतील मुलांना आपले क्रीडागुण दाखविण्याची संधी मिळणार आहे, असे मर्जिया शानू पठाण यांनी या वेळी बोलताना सांगितले.